СВО-да игитвилелди телеф хьайи мад 4 касдиз – Камил Бабаеваз (Кьулан СтIал), Исмаил Бабаеваз (Агъа СтIал-Къазмаяр), Роберт ва Вадим Мирзоевриз (Эминхуьр) абуру кIелай школайра мемориалдин кьулар ачухна.
И мярекатра райондин кьил Саид Темирханова, райсобранидин председатель Штибег Мегьамедханова, хуьрерин кьилери, депутатри, школайрин коллективри, рагьметлубурун багърийри иштиракна.
Райондин гьакимар сифте Россиядин Игит Радим Халикьован тIварунихъ галай Кьулан СтIалрин юкьван школадиз фена. Камил Фейрудинович Бабаеваз мемориалдин кьул ачухунин мярекат РФ-дин Гимн тамамарунилай башламишна. Анал рахай С.Темирханова рагьметлудан диде-бубадиз, багърийриз мад сеферда башсагълугъвал гана, Ватан патал чанар гайи игитрин тIварар, кьегьалвилер инсанрин рикIера, райондин, республикадин ва уьлкведин тарихда амукьдайдакай лагьана.
Камил Бабаеван экуь къамат школьникри, Кьулан СтIалрин администрациядин кьил Марат Исмаилова, муаллим Аминат Мегьамеднабиевади рикIел хкана.
Саид Темирханов кьиле аваз райадминистрациядин жавабдар къуллугъчияр Агъа СтIал-Къазмайрин Руслан Абасован тIварунихъ галай юкьван школадиз фена. Школадин цлал СВО-да телеф хьайи кьегьал хва Исмаил Алимурадович Бабаеваз мемориалдин кьул ачухунин мярекатдал Саид Темирханов, школадин директор Жабраил Асланов, химиядин муаллим Абдурагьман Бабаев, Агъа СтIалрин администрациядин кьилин заместитель Ибрагьим Ибрагьимов рахана. Абуру къейд авурвал, 1994-йисуз Ругунрин хуьре дидедиз хьайи Исмаил Бабаева Агъа СтIал-Къазмайрал юкьван школа акьалтIарна. 29 йисан яшда авай Исмаил 2023-йисан 9-ноябрдиз махсус серенжемдин зонада игитвилелди телеф хьана. Адан уьмуьрдин юлдашди 3 велед тербияламишзава.
И юкъуз Эминхуьруьн Абдул Саидован тIварунихъ галай юкьван школадин цлал кьегьал кьве хциз – стхайрин гадаяр тир Роберт Загьирбегович Мирзоеваз ва Вадим Абдулсаидович Мирзоеваз мемориалдин кьулар ачухна.
Школьникри Роберт ва Вадим Мирзоеврин уьмуьрдин ва къуллугъдин рекьерикай гегьенш рахунар авуна. 1972-йисуз дидедиз хьайи Роберт Мирзоева сифтедай производстводин карханайра кIвалахна, гуьгъуьнлай ада медицинадин рекьяй кьилин образование къачуна. РикI алай пешедиз вафалувал къалурай ада Чечен Республикада, Африкадин са шумуд уьлкведа духтурвиле кIвалахна. Медицинадин къуллугъдин подполковник Р.Мирзоева СВО-дин зонада хирер хьайи цIудралди офицерарни аскерар ажалдин къармахрай акъудна. 2022-йисан 5-июлдиз Роберт Артёмовск шегьердин патарив, вичин къуллугъдин везифаяр тамамардайла, игитвилелди телеф хьана.
Вадим Мирзоев 1988-йисуз дидедиз хьана. СВО башламишай сифте йикъалай ада и серенжемда иштиракзавай. 2023-йисан гатфариз ам отпускдиз хуьруьз хтанай. Сентябрдин вацра ам Работино хуьруьн патав игитвилелди телеф хьана.
— Афгъанистанда интернациональный буржи кьилиз акъуддайла, игитвилелди телеф хьайи ва Яру Гъетрен ордендин сагьиб Абдул Саидован тIварунихъ Эминхуьруьн школа гала, — лагьана Саид Темирханова. — Къе школада Роберт ва Вадим Мирзоевриз мемориалдин кьулар ачухзава. Ихьтин кьегьалар тербияламишун Мирзоеврин хизанра, школада гайи тербиядин нетижа я. Инанмиш я хьи, школада кIелзавайбуру «Жуьрэтлувиляй» орденриз лайихлу хьайи кьегьалрилай чешне къачуда, хъсандиз кIелда, абур Ватандиз вафалу ксар жез алахъда.
Митингдал Роберт Мирзоеван буба Загьирбег Хийировича ва Вадим Мирзоеван диде Ракъужат Багьаудиновнади авур рахунри мярекатдин гзаф иштиракчийрин вилерал накъвар гъана. Абуру СВО-да телеф хьайи чпин рухвайрин тIварар эбеди авун патал кьабулай серенжемрай Дагъустан Республикадин Кьил Сергей Меликоваз ва райондин кьил Саид Темирхановаз сагърай лагьана.
Хазран Кьасумов
