Са йис гьикI акъатнатIани акунач. Шаз гатуз чи дуст, пара хъсан инсан, республикада гзафбуруз сейли профессор, алим, педагог Оружев Идрис Абдуллаевич рагьметдиз фенай. Мартдин эхиррай бедбахт дуьшуьшдик акатай ам саки вад вацра больницада хьана. Духтурри ам кIевяй акъудун патал вири серенжемар кьабулнай, амма…
Идрис Абдуллаевич гзафбуруз хъсанвилер, галайвилер авур кас тир. Адахъ галаз шегьердин куьчейра къекъведайла, и кар мадни тестикь жедай: патав атана, салам гудайбур, яргъаз физватIа, адаз машин теклифдайбур гзаф жедай. Вичи касди тажубвалдай: “Валлагь, вуж ятIа чир хьанач”.
Педагог, техуниверситетдин муаллим яз, ада садрани студентдиз гьахъсуз къимет эцигнач, я сад нубатсуз инжиклуни авунач. Гьавиляй адаз вирида гьуьрметни ийидай. Гзаф йисар алатайлани, виликан студентри адаз чпе-лай алакьдай хъсанвилер ийидай.
Идрис Оружева хайи Кьурагьрин хуьр, агьалияр, район, кIвалахай технический университет, республика патал вичелай алакьдай къени вири крар авуна. Чи дустунихъ вичин 80-йисан юбилей цIи лайихлудаказ кьиле тухудай фикирни авайди тир. Вучда кьван. Вич чи арада амачтIани, веледри, багърийри, дустари, адавай инсанвилин, савадлувилин тарсар къачурбуруни юбилей къейдда. Адан экуь къамат чна рикIера хуьзва.
Нариман Ибрагьимов,
Давид Гьамидов
