Алатай йисан эхирра СтIал Сулейманан райондин администрацияда Украинада кьиле физвай махсус серенжемда телеф хьайи аскеррин хизанрив “Жуьрэтлувиляй” орденар вахкуниз талукьарнавай мярекат кьиле фена.
Агъа СтIал-Къазмайрин хуьряй тир Руслан Абасов 2022-йисан 18-майдиз телеф хьана. Кьасумхуьруьнви Тимур Гьасанагъаев патал серенжемдин эхиримжи женг алатай йисан сентябрдин эвелра кьиле фена. Ватандин вилик хивевай буржи намуслувилелди кьилиз акъуддайла, кьегьалвилелди телеф хьайи аскерриз РФ-дин Президент Владимир Путинан Указдалди кьейидалай кьулухъ “Жуьрэтлувиляй” орденар гана.
Шабагьар СтIал Сулейманан райондин кьил Саид Темирханова Русланан бубадивни Тимуран бадедив вахкана. Мярекатда гьакIни муниципалитетдин администрациядин къурулушрин регьберри, военный комиссар Рейзудин Женетова, Агъа СтIал-Къазмайрин ва Кьасумхуьруьн администрацийрин векилри иштиракна.
Шабагьар вахкудайла, Саид Темирханова телеф хьайи аскеррин хизанриз мад сеферда башсагълугъвал гана ва райондин администрация абуруз яшайишдин месэлаяр гьялунин карда куьмек гуз гьазур тирди, Ватан патал чанар къурбанд авур вири кьегьалрин экуь къаматар халкьдин рикIера эбеди яз амукьдайди къейдна.
Агьмед Магьмудов
