Са шумуд югъ идалай вилик Махачкъалада, Ленинан комсомолдин тIварунихъ галай багъда, Малум тушир аскердин Йикъаз талукьарнавай мярекат кьиле фена. Ана Дагъустан Республикада авай Росгвардиядин Управленидин, РД-дин къенепатан крарин министерстводин, ганвай жаза кьилиз акъудунин рекьяй Федеральный къуллугъдин Управленидин къуллугъчийри, ветеранри, студентри, школайра кIелзавай аялри, ТОКС-дин векилри иштиракна. Мярекатдин тешкилатчи Вирироссиядин “Волонтёры Победы” общественный гьерекатдин Дагъустандин региональный отделение тир.
Митинг кIватI хьанвай ксари, са декьикьада кисна акъвазуналди, Ватан хуьдайла, телеф хьайибурун экуь къаматар рикIел хкунилай башламишна.
Дагъустандин ветеранрин Советдин председатель Магьарам Алижанова дявейра телеф хьайи игитрин къаматри инсанрин рикIера эбеди чка кьун герек тирдакай лагьана.
-120 агъзур дагъустанви Ватандин ЧIехи дяведиз фена, абурукай 90 агъзур касдиз элкъвена хайи ерийриз хтун кьисмет хьанач. Гзафбур къенин юкъузни гел галачиз квахьайбур яз ама. Ихьтин ксарикай малуматар жагъурунал машгъул дестейрин кIвалахдин нетижада гьар йисуз вишералди цIийи тIварар эбеди яз рикIел хуьнин ктабда гьатзава. Ватандин ЧIехи дяведин ветеранрин тIварцIихъай за квахьайбур жагъурзавайбуруз, токсовчийриз, волонтёрриз-баркаллу и кIвалахдал машгъул жезвай виридаз разивал къалурунин келимаяр лугьузва. Сагърай куьн! РикIел хуьх, анжах жуван халкьдин, уьлкведин, республикадин (крайдин), Ватандин ЧIехи дяведин иштиракчийрин тарих чизвайла, чавай виликди физ, чун Гъалибвилин ирсдарар яз гьисабиз жеда, — къейдна М.Алижанова.
Росгвардиядин Управленидин начальникдин куьмекчи Константин Шияна митингдин важиблувал къейд авунихъ галаз сад хьиз, ветеранрин тIварцIихъ чими келимаяр лагьана. Абурун игитвал садрани рикIелай алуд тийирдахъ, квахьайбурун гел жагъурунин кIвалахар инлай кьулухъни давам хъжедайдахъ инанмишвал къалурна.
Митингдал рахай Махачкъаладин Советский райондин администрациядин кьилин заместитель Заур Амиралиева лагьана:
-Чна игитар садрани рикIелай ракъурдач. Абурун руьгьдиз чна гьуьрметзава, юкь агъузна, икрамзава. Лишанлу гьар са юкъуз чна абур, гьакIни дяведин майданра чанар гайибур, абурун игитвилер, кьегьалвилер рикIел хкизва…
Эхирдай Ленинкент посёлокдин 35-нумрадин гимназияда кIелзавай аялри Ватандин ЧIехи дяведа советрин халкьди къалурай игитвилериз, душмандин хура уьтквемвилелди акъвазуниз талукьарнавай шиирар устадвилелди кIелна.
Митинг Азадвал гъайи аскердин памятникдал цуьквер эцигуналди акьалтIна.
Рагнеда Рамалданова
