10-ноябрдиз Махачкъалада къенепатан крарин органрин къуллугъчийрин йикъаз-сувариз талукьарнавай мярекат кьиле фена. “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, ана республикадин Кьилин везифаяр вахтуналди тамамарзавай Сергей Меликовани иштиракна.
Дагъустанда къанун-къайда хуьнин къаравулда акъвазнавайбуруз пешекарвилин сувар мубарак авуналди, ада къенепатан крарин органрин къуллугъчийрин кIвалахдин важиблувал къейдна:
“Инсанриз виридалай мукьва авайбур полициядин къуллугъчияр я: участокра, постарал, ДПС-дин улакьрин экипажра… Квез чи агьалийрин месэлайрикай сифте яз хабар жезва ва куьн абур гьялунив эгечIзава. Куьн гьамиша женгинин постунал алайбур я. Гьатта пешекарвилин сувар къейдзавай юкъузни куь кIвалахдин юлдашрикай гзафбуру уьлкведин ва республикадин мулкарал къанун-къайда, жемиятдин архайинвал таъминарзава”, — лагьана Сергей Меликова.
Вичин рахунра региондин Кьили хейлин йисара вири Кеферпатан Кавказда ислягьвал хьун патал намуслувилелди везифаяр кьилиз акъудай ва акъудзавай Дагъустандин полицейскийриз хас кьегьалвилер, хъсан къилихарни къейдна. “Къанунсуздаказ яракьламиш хьанвай дестейрихъ галаз кьиле фейи женгера чи арадай баркаллу, Ватандин къадир авай гзаф кьегьалар акъатна. Абурун экуь къамат чи рикIерай акъатдач”, — алава хъувуна С.Меликова.
Мярекатдин сергьятра аваз иштиракчийри чпин къуллугъдин рекье везифаяр тамамардайла кьегьалвилелди телеф хьайи Дагъустандин МВД-дин къуллугъчийрин гьуьрметдай хкажнавай Баркалладин мемориалдал цуьквер эцигна ва кIвалахда тафаватлу хьайи са жерге полицейскийрив государстводин шабагьар вахкана.
Мярекатдикай тамамдиз РД-дин Кьилин сайтдай кIелиз жеда.
«Лезги газет»
