10-ноябрдиз Дербент шегьердин кьил Хизри Абакаров вичин хушуналди алай къуллугъдилай элячIна. Идакай ада Instagram-да авай хсуси аккаунтда хабар гана.
“Играми дербентвияр! Уьмуьр са чкадал акъвазнавач, ам виликди физва, гзаф крар дегиш жезва. Къе зун Дербент шегьердин кьилин къуллугъдилай элячIзава. 2020-йисан 11-ноябрдилай шегьердин кьилин везифаяр вахтуналди зи сад лагьай заместитель Рустамбег Пирмегьамедова тамамарда.
За куьн тек тазвач, зун мукьвал-мукьвал шегьердиз мугьман жеда ва чи виридан рикI алай Дербент цIийи хъувун ва хъсанарун патал кьиле тухузвай кIвалахрал гуьзчивал тухуда”, — кхьена Хизри Абакарова.
60 йис хьанвай Хизри Абакарова Дербентдиз 2018-йисан октябрдилай инихъ регьбервал гана. Виликдай ада Государстводин Думадин депутатдин, 2007-йисалай сенатор Сулейман Керимован куьмекчи яз кIвалахна. Дербентдин мэрвиле тайинардалди ада Махачкъаладин международный аэропортдин директоррин советдин председателдин везифаяр тамамарзавай.
Къейд ийин хьи, 10-ноябрдиз Дагъустандин Кьилин везифаяр вахтуналди тамамарзавай Сергей Меликован Указдалди Хизри Абакаров Дагъустан Республикадин Государстводин секретарь яз тайинарна.
«Лезги газет»
