Уьлкведин меркезда духтурвиле кIвалахзавай жегьил пешекар, шаир ва манидар Омар Къазиханов милли къанажагъдин, халкьдин этномедениятдин къадир авайбурукай я.
Ам 1997-йисан 24-апрелдиз Сулейман-Стальский райондин Птидхуьре дидедиз хьана. Мектебда кIелзавай чIавалай адан рикI халкьдин манийрал, лезги эдебиятдин классикрин, иллаки Етим Эминанни СтIал Сулейманан эсеррал алай. 5-классда авайла, жаванди шииратдин рекье вичин къелемни ахтармишна. Гьевес кутадай ксар тахьайвиляй жегьилди са кьадар йисара тесниф хъувунач. 10-11-классар ада Уллу Гъетягърин мектебда куьтягьна. Ана жаван шаирди вичин эсерар муаллимдиз къалуриз хьана.
— Шиирар еридинни метлебдин жигьетдай тарифиз жедайбур туширтIани, муаллимди зи гьевесдин лувар ханач, — лугьузва Омара.
10-классда кIелзавайла, ам СтIал Сулейманан шииратдин йикъаз талукь мярекатдиз ра-къурна. Ана “Регъуьхбан” шиир кIелай Омара са шумуд райондин арада кьиле фейи конкурсда 2-чка кьуна. Гуьгъуьнин йисара ам манийринни шииррин мярекатрикайни конкурсрикай садрани хкечIнач. 2014-йисалай эгечIна, гьар мумкинвал хьайила, ватандиз хтайла, ада Кьасумхуьруьн телевиденида кьиле физвай “Эдебиятдин ким” передачада иштиракзава, вичин цIийи эсеррихъ галаз ватанэгьлияр танишарзава.
Омар Къазиханован асул пеше духтурвал я. 2014-йисуз Волгоград шегьерда медицинадин училищедик экечIай жегьилди 2017-йисуз анаг куьтягьна.
Гуьгьуьллувилелди и ва я маса кардик къуьн, халкьдин медениятдик вичин пай кутаз алахъзавай жегьилди “ЛЕКИ” фондуни лезги чIалаз таржума ийизвай мультфильмайрин сесер кхьизва.
Шииратдин рекье адахъ 2018-йисузни са агалкьун хьана: Кьиблепатан Дагъустандин жегьилрин Союзди милли чIаларал теснифзавай жегьил шаиррин арада тешкилай шииратдин конкурсда ада 3-чка кьуна. Адан яратмишунар “Лезги газетдиз”, “Самур” газетдиз, уртах “Марвар”, “Илгьамдин булахар” кIватIалриз акъатнава. 2018-йисуз ада, Кьасумхуьрел кардик квай “Куьредин ярар” чапханада, “Лекьрен лувараллаз” тIвар гана, вичин шииррин сад лагьай кIватIални акъудна. Ада чи манидарриз манийрин чIаларни кхьизва.
2018-йисалай Москвадиз куьч хьайи жегьил духтурди шегьердин са поликлиникада кIвалахзава. Гьа са вахтунда яратмишунривайни яргъаз хьанвач. Уьлкведин меркезда кьиле физвай лезги мярекатра, концертра иштиракзава, вичи кхьенвай манияр устадвилелди тамамарзава.
Умудлу я хьи, Омара вичин манийралди, шиирралди чун гележегдани шадарда. Кьакьан кукIушар гьеле вилик кума. Агалкьунар хьурай!
К. Ферзалиев
