Чи ватанэгьлияр — гьар сана

Краснодарда яшамиш жезвай карчи, блогер  Заур  Рафидинович   Балакишиев  вичин вахт ва алакьунар метлеблу крариз, проектрал алахъуниз серфзавай ватанэгьли я. Ам заз гьеле 10-12 йис идалай вилик интернетдин лезги форумра иштиракзавай, дуьньядин пипIера авай лезгияр агудзавай, абурук ватанпересвилин руьгь кутазвай ксарикай яз чида.

З.Балакишиев КцIар райондин Вурварин хуьряй я. Ина ам 1981-йисуз дидедиз хьана. Карчивилин кIва­лах­рилай, общественный проектрилай гъейри, ада датIана вичин аялриз чирвилер гунин месэладизни фикир гузва. Ватанэгьлиди компьютерринни интернетдин къенин девирда авай мумкинвилерикай инсанри гъавурда аваз менфят къачун важиблу яз гьисабзава. Гьакъикъатдани, алай аямда гъвечIибуруни, чIехи­бу­руни жуьреба-жуьре гаджетар герек язни, герек тушизни ишлемишзава.

“Аялар телефонрив, планшетрив гзаф къугъваз акурла, бязи диде-бубайри абурук тахсир кутада, къадагъаяр эцигда. Сифте къачуна вугузва аялдив телефон, ахпа вахчузва. Интернет са чIехи алем я. Анжах адакай менфят къачудай рекьер аялриз чна, диде-бубайри, къалурна кIанда”, — лугьузва Заура.

Ада къейдзавайвал, гьар гьикI хьайитIани, пакадин югъ интернетдилай аслу я. Гележегдин несилрини, гьелбетда, чпин девирда, яшайишда кьиле физвай цIийивилерал фикир желб тавуна тадач.

З.Балакишиева кар алакьдайбурун дестедихъ галаз «Спортанец» тIвар алай метлеблу проект кардик кутунва. Адан макьсад дуьньядин машгьур спортсменрихъ галаз гуьруьшар, интервьюяр кьиле тухун ва интернетда раижун я.

“SPORTANES” ютуб-каналдин гъвечIи блогер Заур Балакишиеван хва Мегьамед я. ЦIуд йисан яшда авай ада  вичин алакьунар къалурунин сифте камарни вегьенва. Сад лагьай интервью алай йисан 1-июлдиз кьиле тухвана. Алай вахтунда махсус каналда са шумуд интервью раижнава. Абурай чаз жегьил Мегьамедахъ журналиствилин рекье еке гележег авайди ашкара жезва.

Къейд ийин, гъиле кьунвай проект вилик тухунал са десте ксар машгъул я. Ихьтин гуьруьшар-интервьюяр себеб яз, дуьньяда машгьур хьанвай спортсменриз аялрик руьгь, гьевес кутадай, абур спортдал желбдай мумкинвални жезва.

З.Балакишиева Краснодардин крайда кьиле физвай лезги мярекатрани активвилелди иштиракзава, абур тешкилуник кьил кутазва.  Мисал яз, алай йисуз ана яшамиш жезвай са жерге ватанэгьлийри “Шарвили” эпосдиз талукь суварни кьиле тухвана.

Адаз лезги халк­ьдиз талукь, алай девирдин тIала­бунриз жаваб гудай мад са гегьенш проект кардик кутаз кIанзава. Адакай чун маса сеферда рахада.

Эхь, рикIе къастар хьайила, абур кьилиз акъатун патал гьевесдивди кардивни эгечIна кIанда. И жигьетдай акьалтзавай несилриз хъсан чешне къалурзавай Заур Балакишиевахъ ва гъвечIи блогер Мегьамедахъ гележегда еке агалкьунар хьун чи мурад я.

К. Ферзалиев