Гьеле Советрин гьукумат амазни, чи дагълух инсанриз, хизанарни галаз, Урусатдин шегьерриз, хуьрериз, кIвалахар ийиз, фидай адет авай.
Ингье зунни гьа девирда жуван хизанни галаз Новгородский областдиз куьч хьана. Зун хуьруьн чкада яшамиш жезвай, жуван хсуси кIвал авай. Тевлеяр, салар, векь ядай никIер захъ гзаф авай.
За совхозда, ахпа товариществода, ККХ-да машиндал кIвалахна. И майишатар чкIайла жуван хизан хуьн патал зун алвердин рекье гьатна. За, чкадин халкьаривай малар къачуз, шегьердиз тухуз, маса гуз, кьил хуьзвай.
Гьа ихьтин йикъарикай са юкъуз зун як гваз шегьердин къерехда авай “Акрон” заводдин пищеблокдиз фена. Ана кIвалахзавай кьве жегьилди як авудна, терезрал эцигна, алцумна. Як кьабулна, зав, чун меслят хьанвайвал, пул вахкун лазим тир. Документ туькIуьрдайла, заведующийди завай паспорт истемишна.
Ам кьакьан буйдин, чIулав чIарарин, рикIиз чими дишегьли тир. Паспорт ахъайна, ам дикъетдивди заз килигна. Гьа легьзеда заз адан вилерай хиялрин михьивал акунай.
Заведующийди хабар кьада: — Чун гьи къиметдай рахайди тир?
— 9 агъзур манат са килодихъ гуда лагьана рази хьайиди тир, — лугьуда за. (Ам миллионар амай вахт тир).
— Заз хъсандиз яб це вуна, давамарзава заведующийди, — за вавай як 12 агъзурдай къачузва.
Зун са тIимил фикирдикни акатна, яраб идан ният вуч ятIа?
Заведующийди завай мад хабар кьуна: — Вучиз ятIа, вун гъавурда акьунани?
— Авайвал лагьайтIа, ваъ, — жаваб гана за.
— Ви паспорт ахъаяйла, заз акуна, вун Сулейман-Стальский райондай я. Дагъустандин халкьдин шаир Сулейман зи виридалайни рикI алай шаир я! Гьавиляй завай а касдин тIварунихъ галай райондин агьали ичIи гъилди рекье хутаз жедач…
Антонина Николаевнади зак, гьелбетда, еке гьевес кутунай. Жуван милетдин тIвар вини дережадиз акъуддай ксар гьалтайла, мад гьикI гьиссдайди я!
Тегъи Мегьамедов
