Кьасумхуьрелай тир медсестра Султанагъа Алиевна Уллугъаева чаз масадан дердиникай хабар кьадай инсан, кIвалахдин гзаф йисарин тежриба авай пешекар яз фадлай хъсандиз таниш я. Ихьтин инсанрикай рахадайла, лугьуз жеда: рикI алай кIвалахди адаз руьгьдин таъминвал гузва.
Султанагъа Алиевна 1962-йисуз 10 аял авай Игит диде Амина Шайдаевнадин чIехи ва гьуьрметлу хизанда дидедиз хьана. Ада Кьасумхуьруьн 2-нумрадин юкьван школа ва Дербентдин медицинадин училищедин акушервилин отделение лап хъсан къиметар аваз акьалтIарна.
Вичин зегьметдин рехъ жегьил пешекарди 1984-йисуз Къазахстан ССР-дин Яралиев поселокдин больницада кIвалах авунилай башламишна. 1986-йисалай инихъ С.Уллугъаевади СтIал Сулейманан райондин ЦРБ-да кIвалахзава.
Вири чкайра хьиз, чи республикадани ковид азар чкIай, адакди гзафбур начагъ хьайи вахтунда С.Уллугъаевадин къайгъуяр мадни артух хьана. Хъсан тежриба авай медсестради, кIвалериз физ, агьалийрин сагъламвал вичин кьетIен гуьзчивилик кутуна, начагъ хьайибур сагъар хъувун патал зегьмет чIугуна. Идай Султанагъа Алиевнадиз Дагъустан Республикадин здравоохраненидин министерстводин патай Гьуьрметдин грамота, райондин ЦРБ-дин руководстводин патай пулдин премияр гана.
Кьилин категориядин пешекар С.Уллугъаевади чаз лагьайвал, алай вахтунда диспансервилин учетда саки 400 кас ава. Абур тежрибалу медсестрадин кьетIен гуьзчивилик ква. Инсанрин сагъламвилин къаравулда гьамиша уях яз акъвазнавай ада садакай масадак акатдай азаррин вилик пад кьун, хуьре сагъламвилин замин тир михьивилер хуьн патални еке кIвалах тухузва.
Хазран Кьасумов
