Советрин Союздин, гила Россиядин Федерациядинни США-дин алакъаяр дуствилинбур садрани хьайиди туш. Ватандин ЧIехи дяведа США-дин гьукуматди Советрин Союздиз куьмек ганатIани. И карни ада гележегда чпиз жедай хийир фикирдаваз авуна. Эгер Дуьньядин кьвед лагьай дяведа адан цIук акатай вири уьлквейриз зиян хьанатIа, США-див хейлин хийир агакьна.
Тарихчийри гьисабайвал, Советрин Союздин ва Россиядин регьберар США-дин президентрихъ галаз 86 сеферда (Россиядинбурухъ галаз 53-сеферда) гуьруьшмиш хьана. Абуру вири дуьньядиз, халкьариз талукь къайгъуйрин гьакъиндайни важиблу къарарар кьабулна. Советрин Союздиз «къайи дяве» малумарна, ам чукIурни авуна. Михаил Горбачев ва Борис Ельцин хьтин башчийрин дуьзенавал, душманрин лагълагърихъ инанмишвал себеб яз. Коммунистрин партиядикай азаднавай Россия США-дини, коллективный западдини дуст яз малумарна, мадни кIаникай Россияни пайи-паярдай чинебан хаинвилин кIвалах тухвана. Промышленностдин, хуьруьн майишатдин гзаф карханаяр барбатIна. Халкь къецепатай гъизвай метягьрилай, шейэрилай аслу авуна. Чка-чкада бейкарри армияр арадал гъана. Жаванар, жегьилар, гьатта аяларни, къецепатан вагьши, ахлакьсуз, марифатсуз идеологиядин таъсирдик кутуна. Россия, жуван ватан такIанбурун, къецепатан «джунглийрин» уьмуьр чешне яз кьазвайбурун, малумарзавайбурун кIватIалар майдандиз акъатна. Къецепатай долларар, еврояр, тапшуругъар агакьзавай а кIватIалар чи гьукуматдиз акси митингризни экъечIна.
Владимир Путинан регьбервилик кваз кIватзавай Россия кIвачел ахкьалтиз акурла, США кьиле аваз, коллективный западди чи уьлкведиз «къайи дяведилайни» фейи дяве малумарна. Виликан социализмдин уьлквеяр НАТО-диз кьабулна. Идал бес тахьана, СНГ-дик акатзавай виликан Советрин республикаярни НАТО-диз чIугваз алахъунар авуна. Украинадин миллетбазри вичин халкь, стха Россия, СНГ-дин векиларни маса гана, дустар тушир терефдин теклиф кьабулна ва вичин чилел дяведик цIай кутуна.
Донбассдин урус халкь цIийи фашистрикай хуьн вичин хивез къачунмазди, США ва РагъакIидай патан саки вири уьлквеяр Россиядиз акси экъечIна. Икьван гагьди абуру чпин алчах крар чинеба ийизвайтIа, гила ачухдиз халис дяве малумарна.
Украина Россиядихъ галаз дяве авуниз мажбур авунал алава яз, чи уьлкве агъзурралди къадагъайрин (санкцийрин) къармахра туна. Са патахъай — дяве, муькуь патахъай — экономика кIеве тун, халкь ажугъвилел ва гьукумдиз акси экъечIдай чкадал гъун. Ахпа Россия — дуьньядин зурба государство — терг авун. Адан чкадал чпиз муьтIуьгъ са шумуд республика-государство арадал гъун…
Душманрин, хаинрин мурадар кьилиз акъатнач. Обамадин, Байденан къаюмвилик кваз НАТО-ди, коллективный западди ва Украинадин миллетбазри, бандеровчийри гьикьван алахъунар авунатIани, гьикьван яракьар ганатIани, пулар харжнатIани, Россиядин армияди гъалибвал къазанмишзава, Донбассдин мулкар цIийи фашистрикай азадзава. Россиядин Президент Владимир Путина США-дин патай чи уьлкведиз авай аксивал алудзава. Идан гьакъиндай 15-августдиз Аляскада лап вини дережада аваз кьиле фейи Путинан ва Трампан гуьруьшди шагьидвалзава. Абур сад-садан гъавурда акьуна. Гуьгъуьнлай США-дин президентди гайи баянарни умуд кутадайбур я.
«Россия гзаф гужлу, гьайбатлу государство я. Адаз, США-диз хьиз, дуьньяда сад лагьайди жез кIанзава, маса са уьлкведизни зиян тагана. Им лап кар алай кIвалах я. Украинадикай акI лугьуз жедач…» И гафариз ачух баян гайитIа, адаз лугьуз кIанзавай: Россиядиз акси экъечIдай кьуршах авани вахъ? Кисна ацукь тавуна гвай чкадив. Украинадин тереф хуьзвай, Зеленский гъилерал кьазвай Германиядин, Франциядин, Англиядин, Польшадин, Евросоюздин кьиле авайбурун рикIелни ада тарихдин вакъиаяр хкана. «Урус халкьди Наполеонан, Гитлеран кьушунар барбатIна. Куьн мад, кьил атIумарна, гьиниз физвайди я?»
Ваъ, Макронав, Мерцав, Стармерав, Урсула Фон дер Ляйенав Трампан гафарин мана агакьнавач. Абуру са къатда «чна Украинадиз яракьралди, аскерралди, пуларалди куьмек гуда» лугьуз малумарзава. Чеб магълуб хьанвайди хиве кьаз кIанзавач. Зеленскийдин нехир хтанвайди аквазвач.
Байдена ва адан гъилибанри Россиядиз акси яз тухвай сиясатдин эхир жезва. Дональд Трампахъ галаз кьиле фейи гуьруьшди гьа ихьтин умудар гузва. Владимир Путина, Москвадиз хтайла, къейд авурвал, гуьруьш кьве терефдизни хийирлудаказ, сад-садан гъавурда акьадайвал ва мукьвал тир гележегда са шумуд рекьяй алакъаяр гегьеншарунин къаст аваз кьиле фена. Ихьтин фикирдал США-дин регьбер алайдакай госсекретарь Рубиоди, Трампан махсус векилдини тестикьарна.
Трамп дяве акъвазарунин къастунив ацIанва. 18-августдиз ада и кардин гъавурда мад сеферда Зеленскийни адан амадагар туна. Россия вири месэлаяр ислягьвилелди, къадагъаяр, шартIар, истемишунар галачиз гьялунин терефдал акъвазнава.
Абад Азадов
