Шаз, 2020-йисан ноябрдиз, Махачкъалада республикадин жегьил пианистрин Готфрид Гьасанован тIварунихъ галай ХХI конкурс кьиле фена. Ана Ахцегьрин Рагьимат Гьажиевадин тIварунихъ галай музшколадин (директор — РД-дин культурадин лайихлу къуллугъчи Абдукерим Рагьимов) векилрини агалкьунралди иштиракна. Нетижайрикай делилар анжах гила хтана.
ИкI, дуьньядин классикадин четин яратмишунар вини дережада устадвилелди тамамарунай истемишдай жюридин къарардалди Ахцегь ДМШ-да музыкадин рекьяй чирвилер къачузвай Муслим Шерифалиев (4-класс), Лейла Сулейманова (2-класс), Мегьамед Агьмедов (6-класс) ва Къизилгуьл Шуаева (1-класс) РД-дин культурадин министерстводин, республикадин учебно-методический центрадин I дережадин дипломриз, абурун муаллим, РД-дин культурадин лайихлу къуллугъчи Селимат Велиева Министерстводин чухсагъулдин чарчиз лайихлу хьана.
Республикадин нуфузлу конкурсдин жегьил дипломантар 2-мартдиз райадминистрациядин нубатдин совещанидал “Ахцегь район” МР-дин кьил Осман Абдулкеримова тебрикна, абурув дипломар вахкана ва, гьевесламишунин лишан яз, вичин патай пулдин премиярни гана.
Конкурсда республикадин саки вири районрин музшколайрин векилри иштиракна, абурукай анжах Ахцегь ДМШ-дин аялар тафаватлу хьана. Гьелбетда, эвелимжи нубатда, им музшколадин высший категориядин тежрибалу муаллим Селимат Велиевадин ва директор Абдукерим Рагьимован гьакъисагъ зегьметдин нетижа я. Чна винидихъ чпин тIварар кьур аялриз, абурун диде-бубайризни муаллимриз агалкьун мубаракзава. Къуй квехъ мадни еке агалкьунар хьурай!
Чи мухбир
