Мехъерар шадвал я. Амма паталай свас гъидайла, жегьилрин диде-бубайрин рикIер секин туш. Улакьрин кьадар лап гзаф хьанвай алай девирда свас гъиз цIудралди машинар физва. Шегьрейра абуру улакьар къайдайрал амал тавуна гьалзавай дуьшуьшар самбар я. Адет тирвал, свас гъиз физвай машинрикай сада вирибурал гуьзчивал тухузвай кас тайинарзава. ЯтIани татугайвилер, гьатта бедбахтвилерни арадал къвезва. ИкI тахьун патал гьар са касди мехъеррин иесийрин, чпин диде-бубайрин рикIерикай фикирун лазим я.
Паталай свас гъидайла, рекьер кьунин адетни ава. Месела, Дербент шегьердай свас гъидайла, адет тирвал, Нарын-къеледал фена, жегьилри рикIел аламукьдай шикилар язава. И рекье абурун вилик низ чида шумуд сеферда рехъ кьазвабур акъваззаватIа — аялар, чIехибур. Чпини, адет вад агъзур манат я лугьуз, гьакьван пул истемишзава. Ахьтинбурухъ галаз гьуьжетриз акъатзавай, гьатта гатунар жезвай дуьшуьшарни тIимил туш. Рекьер кьурла, гьуьжетрин шагьидар полицейскияр жезвай дуьшуьшарни ава. Улакьар акъваз хьана, садавай санизни гьал хъийиз техжез амукьзава. И кардиз фикир гузвач.
Вири и крарал чкадин администрацийрин, полициядин отделрин векилри гуьзчивал тухванайтIа, къайдаяр чIурзавайбур жерме авунайтIа, заз чиз, герек авачир, жегьилрин арада къал твазвай ихьтин чIуру адет амукьдачир. Эхь, свас гъизвайбурун вилик сусан магьледин векилар экъечIдай, свас авай кIвалин ракIарал миресрикай сад акъваздай адетар чи хуьрера фадлай авай. Абуру истемишзавайдини недай-хъвадай шейэр авай багълама тир. ЧIуру, зиянлу адетрал эхир эцигайтIа, хъсан я.
Райсудин Набиев
