14-сентябрдиз Докъузпара райцентрада кардик квай медениятдин кIвале, Дагъустандин халкьарин садвилин йикъан сергьятра аваз, “Манияр лугьузвай симер” тIвар алай фестиваль 8-сеферда кьиле фена.
Кьиблепатан Дагъустандин халкьарин меденият хуьнин, музыка вилик тухунин макьсаддалди гьар йисуз Усугъчай хуьре кьиле тухузвай мярекатдин тешкилатчияр и райондин администрация, РД-дин культурадин министерство ва Республикадин халкьдин яратмишунрин кIвал я.
Докъузпарадин культурадин управлениди хуьрерин администрацийрин куьмекдалди медениятдин ирс ва халкьдин яратмишунар хуьнин, раиж авунин карда хейлин кIвалахар кьилиз акъудзава.
Авазринни манийрин мярекатда Кьиблепатан Дагъустандин ВИА-ри, ашукьри, кьилдин манидарри иштиракзава. ЦIинин йисуз фестивалда Докъузпара, Ахцегь, Кьурагь, Мегьарамдхуьруьн, Рутул, Табасаран районрин ансамблри, ВИА-рин манидарри, ашукьри ва музыкадин устадри иштиракна.
Фестиваль башламишдалди вилик райондин кьилин заместитель Салигь Гьажимурадова манидарар, музыкантар тебрикна ва яратмишунра агалкьунар хьун алхишна.
Яб акалзавайбурун гуьгьуьлар шадаруналди, Рустам Рамазанова, Салбина Тагъиевади, Гьуьрият Мегьамедовади, Низакет Абдуселимовади, Шафи Ибрагьимова Дагъустандин шаирри дуствилин, садвилин, ватан кIанивилин темайриз бахшнавай чIалариз кхьенвай манияр тамамарна.
Фестивалдин эхирдай иштиракчийриз Докъузпара райондин кьил Абдурагьим Алискерован патай грамотаяр ва къиметлу савкьатар гана.
Куругъли Ферзалиев
