2-декабрдиз Ахцегьа, ял ядай “Самур” комплексдин къулай залда, “Регьимлувили дуьнья хуьда!” лишандик кваз Виридуьньядин инвалидрин йикъаз талукьарнавай мярекат кьиле фена. Райадминистрациядин къаюмвилик кваз ам Ахцегь КЦСОН-дин (жемятдиз яшайишдин рекьяй къуллугъдай центр) коллективдин къуватралди тешкилнавай. Гьар са нямет алай суфрайрихъ набут ксаризни абурухъ гелкъвезвайбуруз, РД-дин зегьметдин ва яшайишдин рекьяй вилик финин министерстводин, райондин кьиле авай ксариз, районэгьлийриз яшайишдин рекьяй къуллугъзавай идарайрин руководителризни пешекарриз теклифнавай. Ширин суьгьбетрал машгъул ва халкьдин милли манийрикай лезет хкудзавай абурун рикIелай са геренда, на лугьуди, чпин тIал-квални яшайишдин четинвилер алатнавай…
КватI хьанвайбуруз и югъ мубаракуналди ва и суварин тарихдикай куьруь ихтилат авуналди, мярекат КЦСОН-дин пешекар Нари Мегьамедовади ачухна. Ада сифте гаф центрадин директор Мурад Алирзаеваз гана.
— Гьуьрметлу вахар, стхаяр, мугьманар! Къе чун набутрин гуьгьуьл къачун, абурун сагъламвилинни яшайишдин месэлаяр веревирд авун патал кIватI хьанва. Сергьятламиш хьанвай мумкинвилер авай амма рикIин (руьгьдин) чIехивилел гьалтайла, сергьят авачир инсанрин къайгъударвал авун, абур кIвачел ахкьалдариз куьмекун патал и югъ лишанлуди, суваринди я. Мергьяматлувилин къайгъударвал лагьайтIа, чна гьар юкъуз чIугуна кIанда, — къейдна жегьил директор Мурад Бахтияровича.
— Яшайишдин жигьетдай гзаф жавабдарди тир и месэладихъ гьукуматди эхиримжи вахтунда чин элкъуьрзавайди аквазва. Гьуьрметлу балаяр, вахар, стхаяр, къуй куьне садрани къуватсузвал, мергьяматсузвал, игьтияжлувал гьисс тавурай! Аллагь-Таалади куь тIал-квал алудрай, яргъи ва хушбахт уьмуьр гурай! Чна чи патай лагьайтIа, РФ-дин законодательствода къалурнавай вири къуллугъарни кьезилвилер квев агакьарда,- вичин ва райондин кьил Осман Абдулкеримован патай и югъ рикIин сидкьидай мубаракна Ахцегь муниципалитетдин кьилин заместитель Алмас Шуаева.
Сувар тебрикун патал микрофондихъ РФ-дин зегьметдин министерстводин векил, Мегьарамдхуьруьн районда РД-дин МСЭ-дин (медико-социальный экспертиза) 20-нумрадин бюродин регьбер Насият Нагъиева атана.
— Гьуьрметлу юлдашар! Чи арада авай сагъсуз, зайиф ксар инсанрин мергьяматлу рикIихъ, чими гафунихъ, жумарт гъилихъ муьгьтеж тирди абуруз куьмекун сувабдин кар тирди рикIелай алудна кIандач. Эхь, кIевевайдаз мергьяматлувилин, куьмекдин гъил яргъи авун, садакьа гун намуслу, гьал-агьвал квай гьар са касдин буржи я. Общество регьимлу инсанрин куьмекдалди вилик физвайди я. Набутриз къе ихьтин межлис къурмишнавай Мурад Бахтиярович сагърай!
Гуьгъуьнлай кIватI хьанвайбурун тIварцIихъ чими келимаяр агьалияр кIвалахдалди таъминардай центрадин (ЦЗН) пешекар Расим Гъаниева, районда набут аялризни жегьилриз медицинадинни яшайишдин рекьерай куьмекдай центрадин (ГУРЦДПОВ) директор Селиян Мурсаловади, районэгьлияр яшайишдин рекьяй хуьдай управленидин (УСЗН) къуллугъчи Нуржагьан Гьажимурадовади, ЦРБ-дин кьилин духтур Митгьедин Мурсалова, РФ-дин пенсийрин фондунин Ахцегь райотделенидин начальник Фейзуллагь Мирзоева, и цIарарин авторди, районда АТВ-дин директор, дишегьлийрин советдин председатель Таира Мегьарамовади, КЦСОН-дин къуллугъчи Милайим Эфендиевади, набут аялрин диде-бубайрин патай Гуьлнара Генжалиевади ва масабуру лагьана.
Рахунрин арайра гьевескар артистри — Эмирсултан Бигеева, Таира ва Мадина Мегьарамовайри, Мугьаммад Мурадова набут аялрин иштираквални аваз суварин иштиракчийриз хъсан концерт гана.
Эхирдай Мурад Алирзаева мярекатдин иштиракчийриз, вичин патай савкьат яз ресторанда еке жумартвилелди берекатлу суфраяр къурмишнавай карчи, меценат Жигерхан Сулеймановаз, гьакI набутриз пишкешар гайи Ахцегь ЦРБ-дин кьилин духтур Митгьедин Мурсаловаз чухсагъул лагьана.
Дашдемир Шерифалиев
