1-мартдиз РД-дин Гьукуматдин Председатель Абдулмуслим Абдулмуслимова республикадин государстводин СМИ-рин кьилин редакторрихъ галаз гуьруьш кьиле тухвана. Мярекатда гьакIни вице-премьер Ризван Гъазимегьамедова, Дагъустандин Гьукуматдин Председателдин заместитель-чилин ва эменнидин алакъайрин министр Заур Эминова, информациядин ва печатдин министр Умаросман Гьажиева, рекъемрин рекьяй вилик финин министр Юрий Гьамзатова ва масабуру иштиракна.
А.Абдулмуслимова къейд авурвал, СМИ-ри республикадин жемиятдинни сиясатдин уьмуьрда кьетIен чка кьазва ва абурун кIвалах мадни вилик финин месэлайрал республикада цIийиз арадал гъанвай информациядин ва печатдин Агентство машгъул жеда.
Дагъустанда акъатзавай газетрин, журналрин кIвалахдикай рахадайла, Премьер-министрди жегьилриз ватанпересвилин тербия гунин месэлайриз кьетIен фикир гана кIанзавайдакай лагьана. Адан фикирдалди, уьлкведа алай вахтунда арадал атанвай гьаларин шартIара и темадин важиблувал мадни артух хьанва.
А.Абдулмуслимова милли чIаларал акъатзавай изданийрин гьакъиндайни вичин фикирар лагьана. “Зак чи халкьарин милли чIалар, хайи чIаларал акъатзавай газетарни журналар авай гьалари къалабулух кутазва. Эгер инсандиз вичин чIал, халкьдин тарих чизвачтIа, чавай ватанпересвиликайни рахаз жедач. Къенин юкъуз гьар са изданидихъ вилик финин рекье махсус план хьун чарасуз я…”, — къейдна ада.
Гуьруьшдин сергьятра аваз кьилин редакторри Гьукуматдин Председателдиз суалар гана, СМИ-рихъ авай гьялна кIанзавай месэлаяр веревирдна.
Гуьгъуьнлай А.Абдулмуслимов са жерге газетринни журналрин редакцийриз мугьман хьана. “Лезги газетдин” редакцияда кьиле фейи гуьруьшдал кьилин редактор Мегьамед Ибрагьимова А.Абдулмуслимоваз газетдин кIвалахдикай, кьилиз акъудзавай проектрикай, меценатар желб авуналди, редакцияда кьиле тухузвай ремонтдин кIвалахрикай ихтилатна.
Агьмед Магьмудов
