15-майдиз Россиядин Президент Владимир Путина  Крымни Краснодардин край алакъалу ийизвай цIийи муьгъ шад гьалара ачухунин мярекатда иштиракна. Государстводин Кьил муьгъ ишлемишунин базадиз фена ва эцигунардайбурухъ галазни рахана.

Имарат ачухунин мярекатдин сергьят­ра аваз, Крымдин муькъуьн автомобилри гьерекатдай паюнай эцигунардай техникадин колоннаяр фена. И мярекатда гьакI­ни уьлкведин жуьреба-жуьре регионрин муькъвер эцигдайбурун дестейрин ве­килрини иштиракна. Абурун арада БАМ эцигунин, Владивостокда АТЭС-дин саммитдиз гьазур хьунин, Казандин Универсиададин, Сочида кьиле фейи Олимпиададин лап чIехи эцигунрани иштиракай кар алай пешекарар авай.

В.Путин муькъвяй КамАЗ-дин рулдихъ галаз пар чIугвадай са шумуд цIуд машинрин кьиле аваз фена, чIехи имаратдин мягькемвал ахтармишна. Ам Керчдай Краснодардин крайдиз 16 декьикьада агакьна.

Муькъвяй гьерекат башламишдалди вилик Президентди идара авунин Сад тир центрадин  ва ишлемишунин рекьяй къуллугърин­ гьазурлухвал ахтармишна. Муькъвяй кьве патахъайни машинрин гьерекат 16-майдиз башламиш хьана. Сифте анай чкадин агьалияр — крымвиярни кубанвияр — фена.

Муькъуьн ракьун рекьин пай къведай йисуз ачухун пландик ква. ЦIийи муьгъ эцигунин кIвалахар 2016-йисан февралдиз башламишайди тир. Ингье ихьтин зурба имарат са куьруь вахтунда эцигна акьалтIар­нава.

Муьгъ ачухдайла, РФ-дин Президентди къейд авурвал, вири кIвалахар хъсан еридивди ва вахтундилай вилик тамамарнава.

— За куьн тебрикзава. Сад лагьай участок, участок ваъ, сифте линейка, ам­ма, мумкин я, виридалайни важиблу линия ачухзава… Чухсагъул квез, — ла­гьа­на В.Путина. Ада къейдна хьи, и муьгъ ачухунихъ неинки Крым, гьакI Рос­сиядин вири Кьиблепад виликди тухунин карда еке метлеб ава. И шегьредай йиса 14 миллион касдивай физ ва 13 миллион тонн парар дашмишиз жеда.

Президентди инанмишвал къалурна хьи, муькъуьн кьвед ва пуд лагьай паярни вахтунда ва хъсан ери аваз вах­куда. Парар дашмишдай шегьре — зулуз, са йисалай ракьун рекьин участокни ­ачухда.

В.Путина малумарайвал, РФ-дин властри вири уьлкведа цIийи рекьер, муькъвер, портар туькIуьрунин, эцигунин проектар уьмуьрдиз кечирмишунин винел кIвалахда.

* * *

10 агъзур касдилай гзаф тир Крымдин муькъуьн командадилай чIехи эцигунрин гзаф муракаб кIвалахар планламишнавайдалай зур йисан фад кьилиз акъудиз алакьна. Адан машинар фидай шегьре 60-далайни гзаф знакралди тадаракламишнава. Рекье гьерекатдал гуьзчивал авун патал автоматикадин 10 комплекс эцигнава.

Крымдин муьгъ Россияда ва Европада ви­ридалайни яргъиди я — 19 километр. Ам Та­­манский полуостровдилай башламиш жез­ва, 5 километрдин дамбадай, Тузла островдай, Керчдин проливдай тIуз Крымдин къерехдиз экъечIзава.

Къуй регионар, уьлквеяр анжах дуствилин муькъвери алакъалу авурай!

Гьазурайди — Шихмурад Шихмурадов