Кьилин редактордин гаф
2018-йисалай чи уьлкведа регионар идара ийидай центраяр (Центр управления регионом (ЦУР) арадал гъиз гатIунна. ЦУР асул гьисабдай интернетдин жуьреба-жуьре майданра, чешмейра агьалийрин арзайриз, наразивилериз фикир гун патал тешкилнавай государстводин къурулуш я. Дагъустанда ихьтин идара алатай йисан ноябрдин вацра пайда хьана. Адаз Султан Абдуралимова регьбервал гузва.
Центр арадал гъана саки йис тамам жезва, амма халкьдин гегьенш къатариз адакай са акьван хабар авач. Куьрелди лагьайтIа, ЦУР халкьдинни гьукумдин арада авай арачи я. Малум тирвал, чкайрал (иллаки районра) гзаф кьадар агьалияр са дерди туькIуьрун патал уламрани хъутIалра гьатзава. Са справка къачудайла, йикъаралди нубатра акъваззава, месэла гъиле-гъилди туькIуьрун патал ришветар къачузвай дуьшуьшарни малум я. Ихьтин крарин асул чешме бязи къуллугъчияр чпин везифайрив жавабдарвилелди эгечI тавунихъ галаз алакъалу я. Эгер виликдай гьахъсузвилерикай хабар гун патал меркезда авай жуьреба-жуьре идарайриз чарар-цIарар кхьиниз мажбур жезвайтIа, гила интернетдин куьмекдалди лазим тир идарадин социальный сетра авай профилдиз арза рекье тун бес я. Интернетдай арза кьабулнавай идаради, энгел тавуна, адай кьил акъудзава ва арзачидиз гъиле-гъилди жаваб гузва.
Султан Абдуралимован гафаралди, алай вахтунда республикадин 55 муниципалитетда районрин, шегьеррин дережада аваз ихьтин центраяр (муниципальный центр управления, МЦУ) кардик акатнава. Абурун кьилин макьсад агьалийрилай къвезвай арзайриз, наразивилериз, энгел тавуна, фикир гун я.
Ихтилат физвай центр арадал гъанвай муниципалитетрин арада Мегьарамдхуьруьн районни ава. Ам кардик акатнавайдакай гьеле августдин вацра райондин кьил Фарид Агьмедова Инстаграмда авай вичин хсуси аккаунтда хабар ганвай. Эгер Мегьарамдхуьруьн районда яшамиш жезвай агьалидиз тайин са месэладин патахъай хабар кьаз кIанзаватIа, адавай, кIваляй экъечI тавуна, интернетдин куьмекдалди муниципалитетдин администрациядин Инстаграмда авай @admin_magaramkentskii.rayon профилдиз кхьиз жеда. Суалдиз гъиле-гъилди жавабни гуда. Арзайриз, гьакъикъатдани, энгел тавуна, фикир гузвайди мукьвара заз жуван вилералди акуна.
14-сентябрдиз “Лезги газетдин” Инстаграмда авай профилда Мегьарамдхуьруьн райондин 17 хуьре яшайишдин амукьаяр, зирзибил гадардай махсус бакар эцигнавайдакай малумат чапнавай. И макъаладиз интернетдикай менфят къачузвай са шумуд касди баянар ганвай. Абурукай сада Гилийрин хуьре зирзибил гадардай бакар эцигдай майдан туькIуьрнавайди, амма анал бакар алачирдакай кхьенвай. Адан баяндиз гьа юкъуз райондин администрациядин аккаунтдай ихьтин жаваб хгана: “Хийирар! Гилийрин хуьре зирзибил гадардай бакар эцигнава. Эгер куьн и хуьруьн агьали ятIа, квез и кардикай хабар хьун лазим я. Райондин администрациядин пресс-къуллугъди ганвай хабардилай гъейри, и кардикай Гилийрин хуьруьн администрациядин Инстаграмда авай аккаунтдани кхьенва…”.
Маса касди Муьгъверганрин хуьре дигидай цин месэла мус гьялда лагьана хабар кьунвай. Адазни, энгел тавуна, ихьтин жаваб хганвай: “Хийирар! “Минмелиоводхоз РД” ФГБУ-дин Мегьарамдхуьруьн районда авай филиалдин пресс-къуллугъди хабар гузвайвал, алай йисан 12-сентябрдиз “Минмелиоводхоз РД” ФГБУ-дин жавабдар векилар Муьгъверганрин хуьруьз мугьман хьана ва чкадин администрациядин кьил Т.Эгьметхановахъни агьалийрихъ галаз санал Муьгъверган, Кирка, Хуьрел, Чепелар хуьрерин майишатар дигидай целди таъминарунин месэла веревирдна. Нетижада якъин хьайивал, месэла гьялун патал зурба гужлувал авай насос кардик кутунин, са шумуд виш метрдиз цин турбаяр тухунин игьтияж ава. И кар кьилиз акъудун патал талукь идарадиз герек тир документар рекье тунва…”. И чешнедай аквазвайвал, агьалийрин арзаяр хъендик кумукьзавач, абур ахтармишзава, серенжемар кьабулзава. Лагьана кIанда, районра, шегьерра кардик кутунвай центрайри социальный сетра агьалийрилай къвезвай арзайриз фикир гузвай гьалар ЦУР-дин гуьзчивилик ква.
Мукьвара “Дагъустан” РГВК-диз гайи интервьюда С.Абдуралимова къейд авурвал, эхиримжи пуд вацран къене Дагъустандин ЦУР-ди агьалийрилай 10 агъзурдав агакьна арзаяр кьабулна. Адан гафаралди, гьар са арза сифте нубатда “Инцидент Менеджмент” къурулушдиз къвезва. Гуьгъуьнлай ЦУР-дин къуллугъчийри абур гьукумдин жавабдар органрин арада пайзава.
РД-дин ЦУР-дин пресс-къуллугъди хабар гузвайвал, 19-сентябрдилай 24-сентябрдалди “Инцидент Менеджмент” къурулушдиз 574 арза атана. Абурукай 161 — ЖКХ-диз, 137 — яшайишдин месэлайриз, 91 — рекьериз, 47 — аваданлувилин кIвалахриз ва 37 образованидин хилез талукьбур тир. Гьар са арзадиз ам кьабулайдалай кьулухъ юкьван гьисабдалди са сятни 12 декьикьа арадай фейила, жаваб гана.
Шегьеррин, районрин администрацийрин Инстаграмда авай профилриз кхьидайла (арза профилдин директдиз ваъ, ана чапнавай са малуматдин кIаник баянра кхьин шартI я), чIехи гьарфаралди “МЦУ” къейд ая. И дуьшуьшда куь суал жаваб тагана амукьдач.
Мегьамед Ибрагьимов
