Гьажиалиев Расим 1999-йисуз Мегьарамдхуьруьн райондин Советский хуьре Загьирбеган ва Раисадин хизанда дидедиз хьана. ГъвечIи классрилай башламишна, хуьруьн спортдин школада тренер Агъахан Маметован гъилик боксдал машгъул жезвай, вичиз тIебии къуват авай ва хъсандиз техника чирзавай спортсменди сифте хуьре, ахпа районда ва республикада хъсан агалкьунар къазанмишна. ИкI, 2013-2015-йисара адакай жегьилрин арада Кьиблепатан Дагъустандин кьуд сеферда чемпион, кьве сеферда Дагъустандин чемпионатдин призер, кьве сефердани Дагъустандин чемпион хьана.
Гуьгъуьнлай ада Кеферпатан Кавказдин Федеральный округдин (СКФО) призервилин, ахпа чемпионвилин тIварар къазанмишна.
Школа куьтягьай 2016-йисуз адан жебеханада 30-далай виниз грамотаяр, медалар, 8 кубок авай. Гьевескаррин боксдай ада кьве вишелай виниз женгер кьиле тухвана.
2016-йисуз Расим Загьирбегович чи машгьур спортсмен Аскеров Жабаран куьмекдалди ЦСКА-диз кьабулна. 2017-йисуз адакай Москвадин чемпион хьана. 2018-2019-йисара Вирироссиядин “А” классдин турнирра чемпионвилин тIвар къазанмишна. 2020-йисуз Россиядин Кубок патал акъажунра пишкешдин чка кьуна ва спортдин мастервилин тIварцIиз лайихлу хьана. 2020-йисалай Расима пешекарвилин боксда вичин алакьунар къалурзава.
Ялцугърин хуьруьн агъсакъалри рикIел хкизвайвал, Р.Гьажиалиеван чIехи буба Нифтали гзаф къуват квай итим тир, ада дагъдай авахьзавай яц, вичин къуьн кутуна, акъвазарнай.
ЧIехи бубадин къуватдикай Расимазни пай ганва: 2020-2021-йисара пешекарвилин боксдай кьиле тухвай 4 бягьсиникай ада сад 4:0 гьисабдалди, пудни нокаутдалди гъалибвал къазанмишуналди акьалтIарна.
Къуй Расимахъ спортдин мадни кьакьан кукIушар муьтIуьгъардай къуватар хьурай.
Сулейман Пашаев,
Советский хуьр
