(Эвел — 16, 18-нумрайра)

…”ЧIехи чиркинвилин” гьалдиз ”жунуб” гьал лугьуда. ”Жунуб” гьалдавай касдиз гьарам я: капI авун, тIаваф авун, мискIинда ацукьун, Къуръандик хкIун, ам кIелун.

”Жунуб” гьалдикай гъусул тийизвайдаз ихьтин жаза ава: ам чиркин яз амукьзава; адавай капI ва амай ибадатар ийиз жедач; а гьалда адакай малаикар яргъаз жезва; а гьалда жинеррикай хуьн зайиф жезва.

Месин алакъаяр хьайидалай кьулухъ инсандин беден зайиф, къуватсуз жезва, беден чуьхвейла (гъусул авурла), ам къуватлу ва ивидин гьерекат йигин хъжезва.

”Жунуб” гьалда бедендин хамунай акъат­завай зарарлу шейэр, гьекьер ава, хамунал микробар, бактерияр пайда жезва ва абур геждалди бедендал аламукьайла, сагъламвилиз зиян жезва, азарар арадал къвезва.

9. Дишегьлийриз талукь чпяй жаза ва лянет авай гунагь крар авайди ва а гунагь крар авур дишегьлийриз бедбахтвилер, пашманвилер, рикIин тIарвилер, хажалатар жезвайди.

Гьадисра дишегьлийрин ихьтин жуьреяр къалурнава: чпи чеб итимриз ухшар гъиз­вайбур (парталра, кьилин чIарар хкIа­тIунин къайдайра, къилихра, къекъуьнра…), мукьвал-мукьвал сурарал физвайбур, кьейидахъ гьарайиз, чIарар чухваз, кIе­виз лугьунар-шеларзавайбур, чпин бе­дендал наколкаяр ийизвайбур, рацIамар акъуд­завайбур, парикар алукIзавайбур (чара­дан чIарар гилигна, вичин чIарар яргъи ийизвай), ”алукIнавай кьецIилбур” (яни беден михьиз кIеви тавунвайбур), чпел гъуьлуьн ажугъ, хъел алайбур. И гунагь кра­­рикай яр­гъаз хьана, туба авуна кIанда — рикIиз се­кинвал ва саламатвал хьун патал.

10. Кесибриз эвер тавуна, анжах агьваллу ксариз эвернавай мехъер виридалайни пис мехъер тирди.

Гьадисда лагьанва (мана): ”Виридалайни пис тIуьнар девлетлуйриз эверзавай ва кесибар (эвер тавуна) тазвай мехъеррин тIуьнар я”. (Сагьигь). Гьавиляй чна мехъеррик гьам агьваллу, гьамни кесиб ксариз эвер гана кIанда.

Чна Аллагьдивай чаз менфятлу чирвилер гун ва чна абуралди амал авунин карда куьмекун тIалабзава!

Ямин Мегьамедов, диндин алим