Сулейман-Стальский райондиз камалэгьлийринни арифдаррин, алимринни шаиррин, тIвар-ван авай муаллимрин, духтуррин ва маса пешекаррин макан лугьузва. Ибур гьахълу гафар я.
Къе заз баркаллу мад са районэгьлидикай — Россиядин хуьруьн майишатдин илимрин Академиядин Вирироссиядин дармандин ва хъсан хуш ни къведай (атирдин) набататрин илимдинни ахтармишунрин институтдин (Всероссийский научно-исследовательский институт лекарственных и ароматических растений — НИИ ВИЛАР) илимдин чIехи къуллугъчи Зилфикъаров Ифрат Назимовичакай суьгьбет ийиз кIанзава.
Ифрат чпи 1973-2001-йисара Туркменистандин Небит-Дагъ шегьерда кIвалахай кьасумхуьруьнвияр тир Назим ва Ширинат Зилфикъароврин хизанда 1974-йисуз дидедиз хьана.
Ифрат Зилфикъарова 1991-йисуз Небит-Дагъ шегьердин 18-нумрадин юкьван школа гимишдин медаль къачуналди акьалтIарна, гьа и йисуз ам Пятигорскдин фармацевтический институтдик экечIна. Анаг акьалтIарай жегьил пешекарди 1996-1999-йисара гьа и вуздин (1994-йисалай академиядин) аспирантурада кIелна.
“Фитохимическое исследование отходов эфирномасличной розы и создание лекарственных препаратов на их основе” темадай фармацевтический илимрин кандидатвилин диссертация агалкьунралди хвейидалай гуьгъуьниз Ифрат Назимовича пуд йисуз (1999-2002-йисара) Россиядин илимрин Академиядин Дагъустандин илимдин Центрадин Махачкъала шегьерда авай Дагъдин ботанический багъда (Горный ботанический сад) илимдин къуллугъчи яз кIвалахна.
2003-йисалай инихъ лезги кьегьал хци, чна винидихъ лагьайвал, Москвада Вирироссиядин дармандин ва хуш ни къведай набататрин илимдинни ахтармишунрин институтда фитохимиядин ва стандартизациядин отделда илимдин чIехи къуллугъчи яз кIвалахзава.
2008-йисуз Ифрат Назимовича «Новые подходы к разработке и стандартизации лекарственных препаратов из эфирномасличного сырья» темадай фармацевтикадин илимрин докторвилин диссертацияни хвена. Адан кIвалахдиз илимдин руководитель, фармацевтикадин илимрин доктор В.А. Челомбитькоди еке къимет гана.
Ифрат Зилфикъаров 2016-йисалай Россиядин илимрин Академиядин профессор, 4 монографиядин, чапдай акъатнавай 150-далай виниз илимдин кIвалахрин, 3 патентдин, гзаф макъалайрин автор я.
Ада кхьей “Фитохимические исследования отходов эфирномасличной розы и разработка на их основе лекарственных препаратов”, “Сравнительный анализ эфирного масла и СО2-экстрактов полыни эстрагона”, “Вопросы стандартизации препарата “Хлорофиллипта раствор в масле 2%” ва илимдин маса кIвалахрай фармацевтический институтра студентриз тарсар гузва.
Россияда бажарагълу алимрин-фармацевтрин жергеда авай Ифрат Назимовича 10-далай виниз илимрин кандидатар гьазурна, неинки чи уьлкведа, гьакIни къецепатан гзаф уьлквейра илимдинни ахтармишунрин конференцийра фармацевтикадин илим вилик тухуникай докладар авуна, институтра вичин тежриба раижна.
Ифрат Назимовичан уьмуьрдин юлдаш Маргарита Кьасумхуьрелай я. Ада ВИЛАР илимдинни ахтармишунрин институтдик акатзавай “ВИФИТЕХ” ЗАО-да производстводинни технический отделдин начальник яз кIвалахзава. Абурун руш Эльвиради Рязандин медицинадин институтда кIелзава.
И. Зилфикъаровахъ галаз ихтилатар ийидайла, за ихьтин са кардиз дикъет гана. Шегьерда дидедиз хьана, шегьерда кIелна, илимрин доктор, профессор яз кIвалахзавай Ифрат Назимович михьи лезги чIалал фасагьатдаказ рахазва. Ада чаз лагьайвал, кIвале-хизанда абур анжах лезги чIалал рахазва, юлдашдиз, рушазни лезги чIал чизва.
Район 90 йисан юбилей къейд авуниз гьазур жезвай йикъарин вилик за адавай райондикай вичин фикирар лугьун тIалабна.
— Райондиз хкведай мумкинвал заз, гьайиф хьи, гьамиша жезвач — кIвалахар къалин я, — мили хъвер авуна хьиз, лагьана Ифрат Назимовича. — Са шумуд йис тир завай Кьасумхуьрел хквез тахьана. Ина яшайишдин рекьерай хъсанвилихъ хьанвай дегишвилер акурла, зун гзаф шад хьана. Саки вири куьчейра къир цанва, рехъ-куьче туькIвенва. Ачухдиз лугьун, зун яшамиш жезвай Москвадин областдин Серпуховский райондин Оболенск поселокдилай Кьасумхуьр иер, гуьрчег я. Кьасумхуьрел, районда тухванвай ва тухузвай вири хъсан кIвалахрай за райондин кьил Нариман Шамсудинович Абдулмуталибоваз рикIин сидкьидай чухсагъул лугьузва, адаз ва вири районэгьлийриз райондин 90 йисан юбилей мубаракзава. Зи мурад зи рикI алай шаир СтIал Сулейманан тIварунихъ галай район мадни абад, гуьрчег хьун я.
Вахъ кIвалахда, илимдин рекье мадни еке агалкьунар, хизанда хуш бахтлувал хьурай, хайи халкьдин, райондин тIвар хкажзавай гьуьрметлу Ифрат Назимович!
Хазран Кьасумов
