10-октябрдиз Дагъустанда “Лезги диктант — 2020” лишандик кваз международный серенжем кьиле фена. Алай йисуз ам кьвед лагьай сеферда тешкилнавай.
РикIел хкин, 2019-йисуз Сулейман-Стальский райондин депутатрин собраниди кьабулай къарардал асаслу яз, гьар йисан 10-октябрдиз Лезги чIалан югъ къейдзава. И йикъан сергьятра аваз цIи республикадин кьиблепатан районрин, шегьеррин мектебра, жуьреба-жуьре идарайра лезги чIалал диктант кхьена. Тек са Махачкъалада и серенжемда 1200-далай виниз инсанри иштиракна. ЦIинин йисуз кьиле тухвай диктант “Лезги газетдин” 100 йисан юбилейдиз талукьарнавай. Диктандин текстни хайи чIалал акъатзавай газетдин тарихдикай тир.
Къейдна кIанда, къецепатан жуьреба-жуьре уьлквейра авай чи ватанэгьлийри цIи диктант онлайн къайдада (интернетдин куьмекдалди) кхьена. Лезги чIалан йикъаз талукьарнавай кьилин мярекат Сулейман-Стальский районда кьиле фена. Диктантдиз талукь мярекатрикай гегьеншдиз “Лезги газетдин” сайтдай кIелиз жеда.
«Лезги газет»
