4-июндиз Докъузпара райондин администрацияда райондин Кьил Абдурагьим Алискерован регьбервилик кваз, администрациядин кьилин заместителрин, райондин тешкилатрин ва идарайрин руководителрин, хуьрерин администрацийрин кьилерин иштираквал авай нубатдин совещание кьиле фена.
Иштиракчияр йикъан месэлайрихъ галаз таниш авуналди А. Алискерова совещание ачухна. Ада сифте гаф райадминистрациядин экономикадин отделдин начальник Султанмурад Магьмудоваз гана. Вичин нубатда ада налукар кIватIунин планрикай суьгьбетна.
Докъузпара районда кардик квай Россиядин финансрин министерстводин Федеральный казначействодин отделдин руководитель Муъмин Исаева 88-нумрадин «Муьштерийрин ихтиярар хуьнин гьакъиндай» Федеральный законда гьатнавай дегишвилерикай ихтилатна. ИкI, 2019-йисалай гьукуматдин къуллугърал алай пешекарриз гузвай мажибар анжах «МИР» картадин куьмекдалди агакьарда. Идарайрин счетрал пуларин такьатIар вегьин патал, чекар ва маса къайдаяр ишлемишун цIийи йисалай къуватдай акъатда.
Экономикадин отделдин пешекарар тир Музамедин Межидова ва Манаф Атакшиева райондин чилерин часпарар тийинарунин месэла гьикl кьиле физватlа ихтилатна. Абуру къейд авурвал, Усугъчай, Каракуьре ва ЦIийи-Каракуьре хуьрера а кIвалахар акьалтIарнава ва алай вахтунда Миграгъ-Къазмайрал (Кьилерал) кIвалахар давам жезва.
Райадминистрациядин юридический отделдин начальник Марат Крымова алай йисан 28-июндиз Докъузпара райондин администрациядин дараматда Дербент, Мегьарамдхуьруьн, Докъузпара ва Ахцегь районрин территорийра «Самурский» халкьдин парк тешкилунин жигьетдай халкьдин патай яб акалунар кьиле фидайди малумарна.
12-июндиз «Россиядин югъ» сувар къейдзава. Адаз аквазвай гьазурвиликай райадминистрациядин кьилин заместитель Салигь Гьажимурадова суьгьбетна.
Гражданвилин ва тади гьалдин жигьетдай тир райадминистрациядин векил Ренат Агъаметова ва Докъузпара райондин 37-нумрадин пожарный частунин начальник Мегьамед Мегьединова хабар гайивал, цIаяр кьунин хатасузвилин жигьетдай тир гуьзчивилин органри райондин къене тухвай ахтармишунри са жерге эксиквилер винел акъудна. ИкI, райондин территорияда истемишунрихъ галаз кьадай цIай хкадардай гьавизар авайди вири ругуд я. Абурукай пуд Усугъчай хуьре ава. ЦIаяр кьунин дуьшуьшра арадал атай баладин вилик пад тадиз кьун патал, амай хуьрерани гьа ихьтин гьавизар кардик кутун чарасуз тирди абуру къейдна.
Гуьгъуьнлай райондин ветуправленидин руководитель Къурбан Жалалов рахана. Ада къейд авурвал, Республикадин территорияда гьайванрин азарар гегьеншдиз чкIанва, иллаки къарамаларин нодулярный дерматит. Талукь тир вакцинация авун чарасуз я; гьайванрин лешер чилик кучудун лазим я; абур зирзибилрин гьамбаррал гадарна виже къведач.
А. ЭМИРСУЛТАНОВ
