И йикъара чав Мегьарамдхуьруьн райондин Къуйсунрин хуьряй рикI тIардай чIулав хабар агакьна. Денбеден галукьай залан азардикди аялрин рикI алай муаллим, дустарикай лап хъсан дуст, хуьруьн гьуьрметлу агьали Раидин Сраждинович Мегьамеднабиев кечмиш хьана. Ам чидай вирибуру яс чIугвазва, сада-садаз ва хизанриз сабурар гузва.
Р.С.Мегьамеднабиев 1948- йисуз Къуйсунрин хуьре дидедиз хьана. 1966-йисуз Тагьирхуьруьн-Къазмайрин юкьван школа акьалтIарна. 1967-1972- йисара Дагъустандин педагогвилин институтдин филологиядин факультетда кIелна.
Вуз акьалтIарайдалай инихъ 48 йисуз хайи хуьруьн юкьван школада урус чIаланни литературадин муаллимвиле, хейлин йисара завучвиле, директорвиле кIвалахна. ЦIудралди адан виликан ученикрикай хайи хуьре, районда, республикада, масанрани элдин тIварцIел баркалла гъидай крарин сагьибар — муаллимар, алимар, духтурар, хъсан спортсменар, къанун-къайда хуьдай органрин къуллугъчияр хьанва. Р. Мегьамеднабиеван зегьмет райондин, республикадин дережайра тарифдин чарар, грамотаяр, маса шабагьар гуналди къейднава.
Эхиримжи йисара, сагъламвилин гьалдиз килигна, Раидин Сраждиновича ял язавай. Амма хайи мектебдин, хуьруьн, райондин общественный краривай ам къерех хьанвачир. Жегьилринни жаванрин арада тербиядин кIвалахар тешкилзавай, хуьре къайда, низам, михьивилер хуьнин таблигъат тухузвай.
Адан рикI дустарал, иллаки яратмишдай ксарал гзаф алай. Еке мугьманперес, халкьдин савадлувал вине твазвай инсан садлагьана къакъатуни чав гьайиф чIугваз тазва.
Чна рагьметлудан хизанриз, мукьва-кьилийриз, вири багърийриз башсагълугъвал гузва. Раидин Сраждиновичан экуь къамат чи рикIелай алатдач.
Рагьметлудан виликан ученикрин десте ва
Махачкъалада яшамиш жезвай адан дустар —
М.Жалилов, Ш.Шихмурадов, Н.Ибрагьимов, Ш.Гьажимирзоев.
