ДЕРБЕНТ РАЙОНДИН — 97 ЙИС
13-октябрдиз Мамедкъала поселокдин стадиондал Дербент райондин кьибледихъайни кефердихъай инсанрин сел ахмиш хьана.
Стадион чlехи суварин къайдада безетмишнава. Са пата райондин вири хуьрерин гьаятар-майданар ачухнава. Кабабар чразвайбур, чlехи къажгъанра хуьрекар гьазурзавайбур, музыкантрин дестеяр, столар безетмишзавайбур кардик ква. Стадиондин юкьвал гьазурнавай сегьнедал “Севиндж” фестивалдин иштиракчийри гьазурвилер аквазва. Стадиондин кьиблепата хуьруьн майишатдин мекеради кIвалахзава. Ина булдалди салан майваяр, емишар, са шумуд жуьре сортарин ципицIар ва гьакlни райондин чехирар хкуддай заводдин продукцияни авай.
Къе ина Дербент район арадал атана 97 йис тамам хьунин, хуьруьн майишатдин агалкьунар къалурзавай “Къизилдин зул” суварар ва Дагъустан Республикадин культурадин министерстводини Дагъустандин яратмишунрин кlвали тешкилна кьиле тухузвай азербайжанрин фольклордин “Севиндж” фестиваль шад гьалара къейдзава.
Сятдин цlусадаз шадвилер башламиш хьана. Абурук Дагъустан Республикадин Халкьдин Собранидин депутатри, РД-дин министерствойрин векилри, Дербент райондин кьилин везифаяр вахтуналди тамамарзавай Фуад Шихиева, Дербент шегьердин кьилин везифаяр вахтуналди тамамарзавай Энрик Муслимова, Мегьарамдхуьруьн райондин кьил Фарид Агьмедова, Сулейман-Стальский райондин кьил Нариман Абдулмуталибова, Ахцегь райондин кьил Осман Абдулкеримова, Дербент райондин хуьрерин администрацийрин кьилери, образованидин, медицинадин идарайрин ва хуьруьн майишатдин карханайрин регьберри ва агьалийри иштиракна.
Шадвилер райондин вири хуьрерин яратмишзавай, образованидин, медицинадин коллективрин идарайрин, хуьруьн майишатдин работникрин дестейрин параддилай башламишна. Абур стадиондилай фидай вахтунда гьар са хуьруьн ва идарадин агалкьунар раиж ийизвай.
Мярекат Фуад Шихиева ачухна. Вичин рахунра ада хайи чилиз вафалувал ва кlанивал къалурунай райондин агьалийриз сагърай лагьана.
— Дербент районда гьар йисуз гзаф мярекатар тухузва, — къейдна ада. — Вири суваррикай чаз, гьелбетда, иллаки багьади хуьруьн майишатдин зегьметчийрин “Къизилдин зул” сувар я. Къе за райондин агьалийриз ва мугьманриз чна кьиле тухузвай пуд суварни мад сеферда рикlин сидкьидай мубаракзава.
Ахпа ам райондин агропромышленный комплексдин агалкьунрал акъвазна.
Икl, алай йисуз районда 50 агъзур тонндилай гзаф ракъинин кагьрабаяр, 3 агъзур тонн техил, саки 300 агъзур тонн салан майваярни емишар кlватlнава. Им Дагъустан Республикада виридалайни хъсан нетижайрикай сад я. Ихьтин агалкьунар арадал атун патал тарифлудаказ зегьмет чlугурбурун арада агрохолдинг “Татляр”, Ш.Алиеван тlварунихъ галай акционерный общество, Дербентдин чехиррин завод, “Митаги”, “Зидьян”, “Татляр”, “Штул” агрофирмаяр ава. Салан майвайрин хъсан бегьерар Белиж, Нуьгди, Жемикент, Рубас хуьрерин агьалийри кlватlна.
Районда налогар кlватlунин план 117 процентдин ацlурнава. Къенин йикъалди райондин бюджетдиз 190 миллион манат атанва. Экономикада къазанмишнавай агалкьунри алай йисуз райондин вилик квай хейлин месэлаяр гьялиз куьмекда.
Ахпа анал рахай Энрик Муслимова, Фарид Агьмедова хуьруьн майишатдин зегьметчийриз ва райондин вири агьалийриз сувар, фестиваль мубаракна, район йигин камаралди вилик физвайди къейдна ва хуьруьн майишатдин работникриз генани чlехи агалкьунар къазанмишун алхишна.
Мярекатдал Ф.Шихиева ва Э.Муслимова районда тафаватлу хьайи хьуруьн майишатдин, образованидин, культурадин са жерге работникрив Дагъустан Республикадин, РД-дин Гьукуматдин, хуьруьн майишатдин ва суьрсетрин министерстводин патай гьуьрметдин тlварарин удостоверенияр, гьуьрметдин грамотаяр, чухсагъулдин чарар вахкана.
Къейдна кlанда, “Севиндж” фестивални рикlел аламукьдайди хьана.
Санлай къачурла, райондин агьалийри пуд суварни вини дережада аваз кьиле тухвана.
Къагьриман Ибрагьимов
