Мегьарамдхуьруьн райондин пуд хуьр Дагъустан республикадин «150 мектеб» проектдин конкурсда гъалиб хьана. РикIел хкин хьи, къейднавай программадин сергьятра аваз образованидин идараяр ремонтзава.
«Лезги газетдиз» Мегьарамдхуьруьн райондин администрациядин пресс-къуллугъди хабар гузвайвал, алай йисуз Мегьарамдхуьруьн райондин Муьгъверганрин, Гъепцегьрин ва Хъартас-Къазмайрин мектебрин дараматар цIийи хъийида.
РД-дин экономикадин ва территорияр вилик тухунин министерстводи хабар гузвайвал, 2019-йисуз республикадин бюджетдай такьатар къачун патал региондин 47 муниципальный тешкилатдай конкурсдиз талукь документар ракъурнавай. Санлай къачурла, шегьеррайни районрай 251 проектдин документар агакьарнавай.
Къейдна кIанда хьи, проект уьмуьрдиз кечирмишун патал республикадин бюджетдай 300 миллион манатдилай гзаф такьатар чара ийизва. Конкурсда гъалиб хьайи гьар са мектебдин материалринни техникадин гьалар хъсанарун патал 2 миллион манат кьван пул чара ийида.
«Лезги газет»
