СтIал Сулейманан 150 йисан юбилейдиз талукь мярекатар гьеле давам жезва. И йикъара Сулейман-Стальский райондин Алкьвадрин хуьруьн ва Сардархуьруьн ктабханайрин заведующийри –  Лаура Шабановадини Саядпери Селимовади – «Чи илгьамдин чирагъ» лишандик кваз, чIехи шаирдиз талукь шииратдин мярекат тешкилна. Идакай «Лезги газетдиз» райадминистрациядин пресс-къуллугъди хабар гузва.

Шииратдин межлисда Алкьвадрин мектебдин директор Гьамид Гьамидова, медениятдин ва азад вахтунда ял ядай центрадин директор Гуьлпери Сефикъулиевади, хайи чIалан муаллим Ирина Сийидмегьамедовади ва мектебра кIелзавай аялри иштиракна.

Мярекатдин иштиракчийри СтIал Сулейманан яратмишунрикайни уьмуьрдикай ихтилатарна, чпин хсуси фикирарни веревирдер раижна, шаирдин яратмишунрихъ авай метлеблувал къейдна. Малумарайвал, СтIал Сулейман Дагъустандин шаиррикай дуьньядиз машгьур хьайи сад лагьай шаир я.

Шииратдин мярекатдал шаирдин чIалариз кхьенвай манияр тамамарна, аялри гзаф кьадарда адан шиирар устадвилелди кIелна.

«Лезги газет»