И йикъара Кьурагь райондин КIирийрин хуьре, Россиядин Игит Зейнудин Батманов рикIел хкуниз талукьарна, ветеранрин арада волейболдай районрин уртах акъажунар 3-сеферда кьиле фена. Идакай чаз муниципалитетдин администрациядин пресс-къуллугъди хабар гана.
Адетдиз элкъвенвайвал, волейбол къугъунай алакьунар къалурун патал гьар йисуз Кьиблепатан Дагъустандин лап хъсан командайри иштиракзава. Къугъунин нетижада кIватIай очкойриз килигна, гъалибчи ва хъсан чкаяр кьур командаяр тайинарна. ИкI, 1-чка — Кьурагь райондин, 2-чка — Дербент шегьердин ва 3-чка Мегьарамдхуьруьн райондин командайри кьуна. Белиж поселокдин волейболистар 4-чкадал хьана. Вири командайриз талукь тир кубокар, медалар, грамотаяр, спортдин ва пулунин пишкешар гана.
Турнирда лап хъсандиз къугъвайбур яз Далгат Эфендиев (Дербент), Аслан Исмаилов (Мегьарамдхуьр), Руслан Бабаев (Кьурагь) къейдна. КIирийрин мектеб-интернатдин директор Н. Тагьироваз турнир тешкилуник ва кьиле тухуник пай кутунай чухсагъул малумарна.
«Лезги газет»
