Цин еридал гуьзчивалзава
Махачкъала шегьердин прокуратуради 2020-йисан декабрдиз шегьер целди таъминарунин законодательстводал амал ийизвай къайдаяр ахтармишна. Яргъал вахтунда къвазвай марфар фикирда кьуналди ва идакди меркез целди таъминарзавай чешмеда, Октябрдин революциядин тIварунихъ галай къаналда, яд чиркин хьуниз ва идахъ галаз сад хьиз санитариядинни эпидемиологиядин жигьетдай чIуру гьалар арадал атуниз рехъ тагунин макьсаддалди шегьердин прокуратуради, агьалияр целди таъминарунин законодательстводал амал авун яз, алава серенжемар кьабулуниз талукь месэла Махачкъаладин мэрдин вилик эцигна.
Чуьнуьхай пулар вахкана
Шегьердин прокуратуради М-дик РФ-дин УК-дин 159-статьядин 3-пунктуна къалурнавай тахсиркарвал кутазвайвилин гьакъиндай къарар тестикьарна ва Махачкъаладин Советский райондин суддиз уголовный дело рекье туна.
Тайинарайвал, 2018-йисан августдиз М-ди, аялар сагъламардай “Приморский” тIвар алай лагердин директор яз, РД-дин образованидин ва илимдин министерстводиз ял язавай аялрин кьадардиз талукь яз къалп документар агакьаруналди, бюджетдай еке пулар чуьнуьхна.
Ахтармишунар кьиле тухудай вахтунда М-ди вичин тахсир хиве кьуна, чуьнуьхай пулар гьукуматдив вахкана.
Законсуз эцигунар чукIурда
Шегьердин прокуратуради Махачкъалада инсанри чпиз кIанивал чилер, анра кIвалер эцигунин вилик пад кьун патал датIана серенжемар кьабулзава.
ИкI, “Махачкъала-Каспийск” шегьре рекьин къерехда чилер кьуна, эцигунар кьиле тухудай ихтияр авачиз, гзаф квартирайрикай ибарат тир чIехи кьве кIвал эцигзавайди дуьздал акъудна.
Тамамвилелди эцигна кьилиз акъуд тавунвай и дараматар законсузбур тирди тестикьарунин ва абур чукIурунин макьсаддалди прокуратуради шегьердин Ленинский райондин суддиз арзаяр рекье тунвай. Судди абурун тереф хвена, чукIурунин къарар кьабулнава.
Иливнач…
Шегьердин прокуратуради Б-дик РФ-дин УК-дин 159-статьядин 1-паюна къалурнавай тахсиркарвилер авунай кутунвай тахсир тестикьарзавай къарар кьабулна ва Махачкъаладин суддин 17-нумрадин участокдин мировой судьядал уголовный дело рекье тунва.
Ахтармишунри къалурайвал, 2019-йисуз Б-ди, Махачкъаладин Газпромдин техобслуживанидин рекьяй инженерди, агьалийрин кIвалера газдин тадаракрихъ галаз алакъалу яз тапарар авуналди къуллугъар кьилиз акъудиз, пулар чуьнуьхна.
Уголовный делодай ахтармишунар кьиле тухудайла, Б-ди вичик кутунвай тахсир хиве кьуна ва агьалийрив чуьнуьхай пулар вахкана.
Ч.М.Исмаилов, Махачкъаладин
прокурордин чIехи куьмекчи
