Алатай гьафтеда чав шад кьве хабар агакьна: Россиядин Федерациядин Президент Владимир Путина лезги халкьдин бажарагълу, дирибаш, уьтквем кьве хва шабагьралди къейдна.
Эритреяда Россиядин Федерациядин посол Ярагьмедов Азим Алаудиновичаз армиядин генерал лагьай дипломатиядин кьилин чин гана. Ихьтин чин РФ-дин къецепатан крарин министр Сергей Лавроваз, адан заместителриз ва са жерге посолриз ава.
РикIел хкин, Азим Ярагьмедов дипломатиядин ихьтин еке къуллугъдал тайинарнавай сад лагьай дагъустанви, вични Кьасумхуьрелай я.
Эритреяда посолвиле тайинардалди вилик ада РФ-дин къецепатан крарин министерствода, Тажикистанда генеральный консулвиле кIвалахна. 2011-2015-йисара Россиядин МИД-да РФ-дин субъектрихъ, парламентрихъ ва общественный объединенийрихъ галаз алакъа хуьдай Департаментдин директорвилин везифаяр тамамарна.
Ватандиз вафалувилелди, лайихлувилелди къуллугъзавай кьегьал хва хейлин шабагьрин иеси я: РД-дин Верховный Советдин Гьуьрметдин грамотадин, “Россиядин флотдин 300 йис”, “Россиядин МИД-дин 200 йис”, “Россиядин Федерациядин къецепатан политикадин курс уьмуьрдиз кечирмишуник чIехи пай кутунай ва гзаф йисара гьакъисагъвилелди кIвалахунай” медалрин, “Тажикистанда къуллугъ авунай” Россиядин ФСБ-дин знакдин, “Ватандин вилик лайихлувилерай” II дережадин медаль-ордендин ва гьакI масабурун.
Азим Алаудинович, гьар вахт хьайила, хайи ерийрал хквезва, ада вичин багърийрал, мукьва-кьилийрал, дустарал кьил чIугвазва. Гьар йисуз Кьасумхуьруьн школайрин чIехи классра лап хъсандиз кIелзавай кьве аялдиз адан тIварунихъ галай премия гузва.
* * *
“Лезги газетди” алатай йисуз лезги халкьдин арадай акъатнавай генералрикай материалар ганай. Абурун кьадар къадалай виниз алатзава. Ингье рикI шадардай мад са хабар: Россиядин гьавадинни десантрин кьушунрин женгинин гьазурлухвилин рекьяй начальник Рагьманов Арсен Фармановичаз РФ-дин Президент Владимир Путина генерал-майорвилин чин гана.
Арсен Рагьманов Хив райондин Агъа АрхитIрин хуьряй я. Россиядин армияда къуллугъ авунин рехъ хкягъай ада 2003-йисалай Чечен Республикада авай кьетIен везифайрин кьушунрин стрелковый подразделенийрин отделенидин начальниквиле къуллугъна. 2004-йисуз ам кьушунрин женгинин гьазурлухвилин рекьяй отделенидин начальниквиле тайинарна. Полковникдин алакьунар “Жуьрэтлувиляй” ордендалди, “Ватандин вилик лайихлувилерай” II дережадин медаль-ордендалди ва маса шабагьралди къейднава. Арсен Фармановичан уьмуьрдикай, къуллугъдикай гегьеншдиз чна цIийи йисан нумрайрикай сада кхьида.
“Лезги газетдин” редакциядин коллективди Азим Алаудиновичаз ва Арсен Фармановичаз чIехи тIварар рикIин сидкьидай тебрикзава. Абурухъ чандин сагъвал, кIвалахда мадни агалкьунар хьун чи мурад я.
Абад Азадов
