Лезги хуьрер: Пиперхуьр

СтIал Сулейманан райондин Пиперхуьр Кьасумхуьруьвай 13 километрдин кьиблепатахъ экIя хьанва. Хуьруьн тIвар кьве дувулдикай «пипер» ва «хуьр» – ибарат хьанва.

Са мус ятIани хуьруьз Къуза лугьузвай. Гьакъикъатдани, хуьр дагъдин кеферпата ава, рагъ акьан тийизвай пата авайвиляй ихьтин тIвар акьалтна. Аквадай гьаларай, хуьруьхъ пипин тарарин там галайвиляй гуьгъуьнлай хуьрел Пиперхуьр тIвар акьалтна. Пипин там чи йикъарани ама.

Къадим тарих авай и хуьр арадал атай тайин вахт малум туш. Хуьруьн вад участокдал куьгьне сурар ала, анра пIирерин сурарни ава. Хуьре Умарар, КIрар ва Тибинар тухумар ава.

Агьалияр малдарвилел, хуьруьн майишатдал, багъманчивилел машгъул жезвай. Бязи вахтара, кеспи ийиз, шегьерриз физвай.

1886-йисан переписдин делилралди, Пиперхуьре 60 майишат ва 233 агьали (81 итим ва 152 дишегьли) яшамиш жезвай.

1966-йисуз хьайи гужлу залзаладилай кьулухъ хуьруьн агьалияр Мегьарамдхуьруьн райондин Самур хуьруьн чилел куьч хьана. Къейд ийин, агьалийрикай бязибур гьеле залзала жедалдини иниз куьч хьанвай.

1970-йисуз хуьре 42 майишат амукьна ва ана 199 кас яшамиш жезвай. Чи йикъара хуьре 43 кIвал ава, агьалияр — 159 кас. Хуьр Шихидхуьруьн администрациядик акатзава.

Мурад Мегьамедкеримован «СтIал Сулейманан район: ­тарихдин гелерай» ктабдай.