Меркездин Р. Гьамзатован тIвар­цIихъ галай милли библиотекада «Пе­шекар» лишандик кваз респуб­ли­кадин тIвар-ван авай, кIвалахда еке агалкьунар къазанмишзавай, Дагъ­ларин уьлкведин экономикадик, яшайишдик, медениятдик, эдебиятдик лайихлу пай кутазвай инсанар жегьил несилдихъ галаз танишарзавай гуьруьшар кьиле тухузва. Нубатдин гьа ихьтин мярекатда Махачкъаладин медицинадихъ галаз алакъа­лу вузрин, колледжрин студентар РД-дин диагностикадин центрадин рентгенологиядин отделенидин заведующий, Дагъустандин лайихлу ва кьилин дережадин духтур, вичин рекьяй чIехи пешекар-устад Рамазанов Рзакь Назировичахъ галаз таниш хьана.

Библиотекадин культурадин прог­раммайрин отделдин заведующий Ольга Алиевади жегьилриз куьрелди Рзакь Назировичикай суьгьбетна­. Духтурдин, устад рентгенологдин агал­кьунрикай, ада гьар юкъуз инсан­рин сагъламвал патал чIугвазвай зегьметдикай, лап кIеве гьатай азарлуйриз куьмек гайи дуьшуьшрикай, республикадилай къецени кваз къазанмишнавай гьуьрметдикай адахъ галаз кIвалахзавай юлдашри, дустари, азарлуйри ихтилатна.

РДЦ-дин кьилин духтурдин за­мес­­титель Румия Тонаевади, медици­­надин университетдин проректор Рафик Бутаева, рент­­генологиядин кафедрадин заве­дую­щий Саид Абдул­къадирова, и цIа­ра­рин авторди, «Даг­потребсоюз­дин» начальникдин заместитель Фейрудин Нагъиева, бизнесмен Алау­дин Агьмедова, генерал-полковник М. Танкае­ван тIварунихъ галай фондунин председатель Гьасангьуьсейн Абдулжелилова Рзакь Назировичан виниз тир пешекарвал, устадвал, инсанвал, регьимлувал, къайгъударвал, ада дуьзгуьн диагноз эцигун себеб яз, вишералди инсанар кьиникьикай къутармиш хьайи дуьшуьшар рикIел хкана.

Гь. Абдулжелилова, вири залди капар ягъуналди, духтурдиз респуб­ликадин жемиятдин кьилин шабагь — «Честь и гордость Дагестана — Золотой орел» орден гана.

Рзакь Рамазанова студентрин гзаф суалризни жавабар гана. Пешекарди вич медицинадиз гьикI атайди ятIа, хъсан духтур хьун патал вуч авуна ва гьикI зегьмет чIугуна кIан­датIа, духтур вич гьихьтинди хьун лазим ятIа, гьадакай ва диагностикадин цент­радин рентгенологиядин отделени­дин коллективдин муракаб ва пара герек тир кIвалахдикай гегьеншдиз суьгьбетна.

Гуьруьш «Самури» ансамблдин векилар Динамудин Азимова, Рауф Бабаева, Хейруллагь Ибеева, манияр лугьуналди, мадни итижлу авуна.

Нариман Ибрагьимов