Англиядин писатель, тарихчи Томас Карлейлла гьахълудаказ къейд­нава: “Жуван пеше, кар жа­гъай­ди хушбахтлу я. Къуй ам мад лезетлу кардихъ къекъуьн та­­ву­рай! Адахъ вичин кар ва уьмуьр­дин макьсад ава”. Вичин кар жа­гъан­вай, уьмуьрдин макьсад намуслувилелди тамамарунихъ ялзавай, пешеди руьгьдин таъминвал гузвай инсанрикай сад яз, завай СтIал Сулейманан райондин центральный больницадин (ЦРБ) по­ликлиникада духтур-терапевт яз кIвалахзавай  Мумина  Фуадовна  Абдуллаевадин тIвар кьаз жеда…

Тамам 42 йисуз здравоохраненидин хиле намуслудаказ зегьмет чIугвазвай, Гиппократан кьинез вафалувал къалурзавай, хиве авай везифаяр уьзягъдаказ кьилиз акъуд­завай Мумина Фуадовнадихъ  духтур хьунин мурад гьеле школада кIелзавай йисарилай авай. Кьасумхуьруьн юкьван школа акьал­тIа­рай руш Дагъустандин госмединститутдин лечебный факультетдик экечIна. 1980-йисуз анаг хъсан чирвилер аваз акьалтIарна.

Жегьил пешекарди  сифтегьан кьве йисуз Грозный шегьердин 4-нумрадин больницада ва Гудермесдин ЦРП-да духтур-терапевт яз кIвалахна. Гуьгъуьнлай Мумина Фуадовна хайи райондиз хтана, вичин рикI алай пешедай кIвалахун давамарна. ИкI, 1982-йисан 25-октябрдилай райондин центральный больницада жегьилрин кабинетдин духтур-терапевтвиле (1987-йисалди), 3-нумрадин участокда духтур-терапевтвиле, хизандин духтур-терапевтвиле (ВОП), 1998-йисан 1-декабрдилай 2017-йисан декабрдалди ЦРБ-дин кьилин духтурдин заместителвиле, духтур-терапевтвиле ва 2017-йисан декабрдилай 2022-йисалди ЦРБ-дин кьилин духтурдин медицинадин хиляй заместителвиле кIвалахна.

Алай вахтунда Мумина Фуадовнади, винидихъ къейднавайвал, ЦРБ-дин поликлиникада духтур-терапевт яз зегьмет чIугвазва.

Гьелбетда, духтурдин кIвалах регьятди туш. “КIвалахзава”, “зегьмет чIугвазва” гафарин далдадихъ Мумина Абдуллаевади ахвар тавур йифер, кьарай квахьай йикъар гзаф гала. КIвалахзавай йисара ада цIудралди инсанрин сагъламвал мягькемар хъувуна, шумудни са кас ажалдин къармахрай акъудна.

Мумина Фуадовнадин намуслу зегьметдин гьакъиндай адаз ганвай шабагьри ачухдиз шагьидвалзава. Ам кьилин категория авай духтур, “Дагъустан Республикадин лайихлу духтур я” (2012-йис). Ам “Дагъустан­дин дишегьлийрин Союз” региондин общественный организация­дин (2020-йис), коронавирус чу­кIу­нин вилик пад кьуник ва и азардик начагъбур сагъар хъувуник еке пай кутунай РД-дин Кьил Владимир Васильеван (2020-йис), Дагъустан Рес­публикадин здравоохраненидин министерстводин патай (2020-йис) чухсагъулдин чарар ва гьуьрметдин грамотаяр гуниз лайихлу хьана.

— Начагъдиз больницадиз атана, сагъ хъхьана хъфей гьар са кас зун патал виридалайни чIехи шабагь я, — лугьузва Мумина Фуадовнади.

ЦРБ-диз фейила, чаз аниз хуьрерай атанвай инсанрихъ галаз Мумина духтурдикай рахадай мумкинвал хьана. Кьилди къачуртIа, Э.Эмирбеговади (Чуьхверхуьр), Р.Нагъиева (Эминхуьр), А. Мегьамедовади (КIварчагъ дере), М.Тагьирова (ЦIийи Макьар) ва масабуру Мумина Фуадовнадикай разивилин келимаяр лагьана.

— Гьакъикъатдани, Мумина Фуадовна районда лап хъсан пешекаррикай сад я, — къейдзава райондин центральный больницадин кьилин духтурдин заместитель — поликлини­кадин заведующий Мевлидин Алиомарова. — Хуьрерин агьалийри хьиз, адан кIвалахдилай больницадин кьиле авайбуруни  разивал ийизва.­

Вахъ мягькем сагъламвал, кIва­лахда агалкьунар ва кефсуз яз боль­ницадиз къвезвай гьар са касдизни ви гъиликай куьмек хьурай, гьуьрметлу Мумина Фуадовна!

Хазран Кьасумов