4-июлдиз, къецепата арадал атанвай гьаларни фикирда кьуна, Дагъустан Республикадин экономика пайгарвилелди вилик тухун таъминарунин гьакъиндай Оперативный штабдин заседание кьиле фена. Ам РД-дин Кьил Сергей Меликова тухвана. Идакай “Лезги газетдиз” РД-дин Кьилин пресс-къуллугъди хабар гана.

Мярекатдал умуми веревирдер ийидалди вилик Сергей Меликова республикадиз Сад хьанвай Арабрин Эмиратрин Россияда авай посольстводин делегация къвезвайдакай хабар гана. “Дагъустанда акъудзавай ва гьасилзавай суьрсетдиз ва чахъ галаз амадагвилин алакъаяр хуьниз­ къецепатан уьлквейри еке итиж ийизва”, — къейд­на С.Меликова. Ада рикIел хкана хьи, Да­гъустанди Ирандихъ ва Белорус­сия­­дихъ ­галазни бязи икьрарар ку­тIуннава.

РД-дин Гьукуматдин Председатель Абдулмуслим Абдулмуслимова Дагъларин уьлкведин векилар Беларусь Республикадиз финикай суьгьбетна. Меслят хьан­вайвал, Дагъустанда Минскдин тракторар акъуддай заводди техника ремонтдай центр, цепь алай гъвечIи тракторар акъуддай цех эцигда. Дагъустанди Белоруссиядиз хуьруьн майишатдин суьрсет, сар ва маса суьрсет рекье твада. ГьакI­ни Белоруссияди чи республикадин обра­зова­ни­дин ва здравоохраненидин идара­яр­ не­кIедин суьрсетдалди таъминарда.

РФ-дин Федерациядин Советдин спикер Валентина Матвиенкодин иштираквални аваз Минскда кьиле фейи форумдал Россиядинни Белоруссиядин хейлин регионри, гьа гьисабдай яз Белоруссиядини Дагъустанди, санал кIвалахунин, ама­­дагвилин сергьятар гегьеншарунин Пландал къулар чIугунва.

Дагъустанда экономика пайгардик кутунин ва вилик тухунин мумкинвилер Валентина Матвиенкоди, Дагъустандиз атай­ла, чирда. Идан гьакъиндайни РД-дин Кьил Сергей Меликова хабар гана. Малум хьайивал, Россиядин Федерациядин Федеральный Собранидин Федерациядин Советдин Председатель “Дагъустан Республика яшайишдинни экономикадин рекьяй вилик тухуниз государстводин па­тай куьмек гунин гьакъиндай” къарар уьмуьрдиз кечирмишзавай гьалдихъ галаз таниш жеда. РикIел хкин хьи, и къарар­ 2021-йисан мартдиз, Федерациядин Советда Дагъустандин Йикъар кьиле фейила, кьабулайди тир.

Заседанидал республикадин регьберди РД-дин Гьукуматдал умуми образованидин идараяр цIийи кIелдай йисаз гьазур хьунин гьал, иллаки капитальный ремонт кьиле тухузвай школаяр ахтармишун тапшурмишна.

Республикадин здравоохраненидин  идараяр кутугай гьалдиз гъуникай ихтилат фейила, региондин Кьили здравоохраненидин министерстводал Тлярата райондин больницадин садакай масадак акатдай азаррин отделение ремонтзавай ва Избербашдин больницадин дарамат эцигзавай гьаларал гуьзчивал авун тапшурмишна.

Сергей Меликован нубатдин тапшуругъ Донбассдай Избербашдиз катна атанвай хизандиз куьмек гунихъ галаз алакъа­луди тир. Кьуд касдикай ибарат хизан (ди­де-буба бишибур, рушан 7 йис я, баде­ни — пенсионер), малум тир вакъиаяр себеб яз, Донецкдай катуниз мажбур хьана. Къе абур Дагъустанда ава. Гьавиляй хизандиз вири жуьредин куьмекарни гана кIанда.

Экономикада авай гьаларикай ва ам пайгарди авун патал кьабулзавай серенжемрикай Оперативный штабдал РД-дин Гьукуматдин Председателдин Сад лагьай­ заместитель Руслан Алиева суьгьбетна.

“Чна сифте нубатда кIвалахдай чкаяр ва инсанрин дуллухар хуьн патал алакьдай вири крар авуна. Экономикадин кар алай хилериз куьмек гун патал хейлин­ серенжемар кьабулна. Пенсионерар, гзаф ая­лар авай хизанар ва кIеве авай агьалияр­ни рикIелай алуднач”, — лагьана Р.Алиева.

Заседанидин иштиракчийри республикадин школайра капитальный ремонт кьиле физвай гьални веревирдна. РД-дин об­разованидин ва илимдин министрдин сад лагьай заместитель  Мегьамед Абидова хабар гайивал, 1-июлдалди муниципалитетрив ремонтдиз талукь финансар (827,4 миллион манат) агакьарнава.

“199 объектдикай 80 школа ремонт авунин кIвалахар писбур туш. Анра 50-90 процентдин кIвалахар тамамарнава. 118 дараматда ремонт авунин кIвалахар графикдилай гуьгъуьна ама. Анра ремонт авун бажагьат 15-августдалди  куьтягьиз жеда”, — къейдна М.Абидова.

Заседанидал гьакIни къведай йисар па­тал заявкаяр гьазурунин месэлани ве­ре­вирдна. ИкI, РФ-дин просвещенидин ми­­­нистерстводи регионрай федеральный бюджетдин гьисабдай (софинансирование) образованидин идараяр ремонт ­авуниз талукь заявкаяр 15-июлдилай         5-август­далди кьабулзава.

— Проектриз талукь документар, гъа­латI­­риз рехъ тагана, ерилудаказ гьазурна кIан­да, — лагьана М.Абидова. — Проектар алай аямдин дизайнеррин кIва­лахар, школьникриз кIелдай къулайвилер фикирда кьуна туькIуьрна кIанда.

РД-дин Гьукуматдин Председатель А.Абдулмуслимова жавабдар министерствойрал, муниципалитетрихъ галаз санал, школаяр капитальнидаказ ремонт авуниз талукь проектдин документар еридивди гьазурунал гуьзчивал авун таъминарун ва, чкайрал фена, ремонт кьиле физ­вай гьал ахтармишун тапшурмишнава.

Хийир Эмиров