СтIал Сулейманан райондин Гуьне патан хуьрерикай сад тир Зугьрабахуьр камаллу рухвайрални рушарал, тухумрални хизанрал тарифлу я. Ихьтинбурукай сад тир Агъабалаеврин хизанда муаллимар, духтурар, алимар ва къайдаяр хуьдай органрин пешекарар гзаф ава. Хуьре ва адалай къецепата тариф авай рагьметлу Агъабала Агъабалаева камаллу 5 хва чIехи авуна, вирида кьилин чирвилер къачуна, жуьреба-жуьре рекьерай Ватандиз къуллугъзава.
Макъалада чаз Мирзерагьим Агъабалаеван руш Сейфуллаева Тамиладикай ихтилат ийиз кIанзава. Инал заз Тамиладин дах Мирзерагьима — инженер, диде Марията, Дагъустандин пединститут куьтягьна, муаллим яз кIвалахайдини рикIел хкиз кIанзава. Абурун чIехи гада Артур эцигунардай устIар, гъвечIи гада Заур карчивилел машгъул я.
Тамила Мирзерагьимовна 1977-йисан 14-декабрдиз Узбекистандин Бухарский областдин Караул-Базар хуьре дидедиз хьана. 1983-йисуз Къизляр райондин Косякино хуьре мектебдиз фена. 1993-йисуз 11-класс хъсан къиметралди куьтягьай руш Къизлярда медучилищедик экечIна. Гуьгъуьнлай жегьил пешекарди вичин зегьметдин рехъ агьалийриз яшайишдин рекьяй къуллугъдай идарада кIвалахунилай башламишна. Са йисалай макьави Сейфулаев Мусайибани Агъабалаева Тамилади сирер садна. Дагъустандин пединститут куьтягьай адан уьмуьрдин юлдашди алай вахтунда райондин музшколада муаллим яз кIвалахзава, гьа са вахтунда «Девран» ансамблдизни регьбервал гузва.
Абурун хизанда цуьквер хьтин 2 рушни са гада тербияламишна. ЧIехи руш Алинади 2016-йисуз Герейханован 2-отделенидин хуьруьн школа агалкьунралди куьтягьна, вичин дидедин пеше хкяна. Гьа и йисуз ам Саратовдин госмедуниверситетдик экечIна. 2021-йисуз вуз акьалтIарай Алинади кIелунар алай вахтунда ординатурада давамарзава. Кьвед лагьай руш Минаради 2020-йисуз къизилдин медалдалди школа куьтягьна, ам Саратовдин юридический академиядиз гьахьна, исятда ана кIелзава.
Гада Амина школа 2022-йисуз куьтягьна. Ада компьютеррин рекьяй институтдиз физ гьазурвилер аквазва. Алай вахтунда Кьасумхуьруьн КТВ-да кIвалахзава.
Т.Сейфуллаева 2006-йисалай Герейханован 2-отделенидин хуьруьн школада медсестра я. Яргъал йисара намуслувилелди кIвалахзавай адаз гьам хуьре, гьамни школадин коллективда еке гьуьрмет ава.
Вадим Жамалдинов
