Августдин вацран сифте кьилера зун Дербент райондин Агълабрин юкьван­ мектебда лезги чIалланни литературадин тарсар гузвай муаллим Рамина Расуловнади Москвадин областдин Бала­шиха шегьердай хтанвай вичин вах, здравоохраненидин отличник Ульяна Мамедовадихъ галаз танишарна. Ам 1976-йисан 5-августдиз Агълабрин хуьре­, вичин ери-бине Кьурагь райондин Цилинг­рин хуьряй тир зоотехник Расулан хизанда дидедиз хьана. Ирид аял авай хизанда ам виридалайни гъвечIиди тир. Агълаб­рин юкьван мектеб 1993-йисуз чеш­нелудаказ акьалтIарай ам Дербентдин «ЮЖДАГ» институтдин медицинадин факуль­тетдик экечIна. Кьвед лагьай курс акьалтIарай 1995-йисуз институт агална. Ина кIелзавай студентар маса чкайра, садбур — Астрахань ва муькуьбур Махачкъала шегьерриз фена, кIелун давамаруниз мажбур хьана. У. Мамедовади Дагъустандин медицинадин академиядин лечебный факультетда кIелун давамарун кьетIна. 2001-йисуз академия вири предметрай вадар аваз акьалтIарна. 2001-2003-йисара ада Сеченован тIвар­цIихъ галай Москвадин медицинадин академияда клиникадин ординатурада кIе­лун давамарна.

2007-йисуз ам Москвадин областдин­ Балашиха шегьерда авай перинатальный­ центрада акушер-гинекологвиле кIвала­хал акъвазна. 2013-йисуз Москвадин «Ин­новацийрин ва ара датIана образова­ние гузвай медико-биологический универ­си­тетдин» учебный центрада ультразвукдин диагностикадай (УЗИ) пешекарвилин чирвилерин сертификат къачуна.

Центрадин кьиле авай ксари пешекарвилин рекьяй хъсан чирвилер авай, гьакъисагъдиз зегьмет чIугвазвай У. Мамедова кIвачел заланбуруз патология авай отделенидиз духтур яз ракъурна. 2023-йисуз Ульяна Расуловна гьар йисуз Подмосковьеда тухузвай конкурсда  «Подмосковный врач» премиядиз лайихлу хьана.

«Ульяна Расуловнадин сабурлувилиз, кар алакьдай гъилериз, къайгъударвилелди кIвалахдив эгечIуниз килигна, дуьньядиз вишералди таза сагъ аялар атана. Отделенидин коллективди лайих­лу гъалибвал мубарак авуналди, вун хьтин вини дережадин пешекардихъ галаз кIвалах авунал дамахзава», — лагьанай а вахтунда центрадин кьилин духтурдин заместитель Людмила Владимировнади.

– Ульяна Расуловна, куь центрадин кIвалахдикай куьрелди ихтилат авунайтIа, хъсан жедай, — теклифна за.

— Центрада гележегдин дидеяр консультациядиз атай йикъалай аял хадалди ва аял хайидилай гуьгъуьнизни чи гуьзчивилик ква. Чи гьар са пациентдин тарих кьетIенди я. Отделенидин къуллугъчияр  кар чизвай, чпин кIвалахдал рикI алай халисан пешекарар я. Духтуррини медсес­трайри пациентриз датIана лазим тир дикъет гузва.

– Чаз ван хьайивал, куьне мукьвал-мукьвал «ачух ракIаррин» йикъар тухузва. Куьн квекай рахазва, атайбуру иллаки квез итиж ийизва?

—  Эхь, дугъриданни, центрада гьар гьафтедин хемис югъ «ачух ракIарринди» я. Чна атайбуруз чи центрадикай ихтилатзава, экскурсия тешкилзава ва суьгьбет «суал-жаваб» къайдада давамарзава.­

– Гзаф гузвай суалар гьибур я?

— Мукьвал-мукьвал гузвай суалрикай сад партнервилин родриз талукьди я. Россиядин къанунрал асаслу яз, багъри инсанриз аял хадай чкада акъваздай ихтиярар ганва, эгер дишегьли аял хазвай блокда кьилди аваз хьайитIа. Чи центрада ихьтин шартIар авазва.

– Чи дишегьлийризни и кар итижлу хьун мумкин я. Абур куьн акъваззава?

— Партнервилин родрин къуллугъ, ОМС-дин программадин сергьятра аваз, пулсузди я. Адакай виридавай менфят къачуз жезва. Ахьтин родра неинки ге­лежегдин аялдин бубадивай, гьакIни дидедивай, вахавай, дуст рушавай иштиракиз жеда. Кьилинди ам яш тамам хьанвайди ва марифатлувилелди гьазурди хьун я.

Зун Москвадин областдин перинатальный центрадин «ВКонтакте» сетда­ авай чиниз гьахьна. Ана и центрадин духтуррикай гзаф хъсан келимаяр кхьенва. Ингье 25-апрелдиз «кесарево» операция авуналди аял хайи Федотова Марияди кхьенвай гафар, ганвай къимет: «Зун бахтлу инсан хьана, пациентриз виридалайни гзаф дикъет гузвай духтур Ульяна Расуловнадал ацалтна. Сифте кьабулайла, ада зи анамнездиз гзаф дикъет гана, зав гвай чарара авай куьлуь-шуьлуьяр, ахтармишунар чирна. Икьван йисара сифте яз зи вилик зи тIалдин месэладай жавабдарвилелди кьил акъудзавай духтур квай.

Ульяна Расуловна тIвар чIехи гьарфуналди кьазвай пешекар я. «Кесарево» операциядилай гуьгъуьниз авунвай цвал ерли чир жезвач. Зун отделенида авай йикъар суварал гьалтнавайтIани, ам гьар юкъуз заз килигиз, зи гьал хабар кьаз къвезвай. Пара михьи рикI авай, дикъетлу инсан я. Куь зегьметдиз лазим къимет гудай разивилин гафар заз бес жезвач. Куьн Аллагьди хуьрай!»

Центрадин чина У. Мамедовадин тIвар­цIихъ кхьенвай ихьтин келимаяр мадни ава. Ихьтин ихтилатрихъ йисаралди гуьзлемишун, духтурдин пешекарвал, медперсоналдин къайгъударвал ва кьилинди яргъалди вилив хуьзвай цIийи инсан дуьньядал атун гала.

Яргъал йисарин гьакъисагъ зегьметдай, пешекарвилин устадвиляй, илимдин ва здравоохраненидин рекьера къазанмишнавай еке агалкьунрай ва медицинадин кадрияр гьазурунай У. Мамедова хурудал алкIурдай «Здравоохраненидин отличник» лишандиз лайихлу хьанва.

Шабагь тебрикдайла, Москвадин областдин перинатальный центрадин кьилин духтур Ольга Серовади чи ватанэгьлиди центрада акушервилин куьмек вилик тухуник кутунвай пай ва пациентри адаз ийизвай еке ихтибарвал къейдна.

2001-йисуз Ульяна Расуловнадини Иб­рагьим Мамедова чпин сирер сад авуна. Военный хирург, полковник Ибрагьим Мамедов СВО-дин иштиракчи, Росгвардиядин медицинадин махсус дестедин командир я. Абурун чIехи руш Аминади — Москвада медицинадин институтда, Камиллади 7-классда кIелзава.

Ульяна Расуловна, гележегда вахъ мадни зурба агалкьунар, хизандани мадни хушбахтлувал хьун чи мурад я.

Къагьриман  Ибрагьимов