Гатфар. ТIебиатда лап гуьзел вахтарикай са бере я. Гуьлуьшан юкъуз, 1967-йисан 6-июндиз, Кьасумхуьрел Рамазанов Мурадханан хизанда бицIек хьана. Адал хизандин сагьибди бубайрилай атанвай аманатлу ирс авай Мегьамед тIвар эцигна. Мегьамед са тIимил уях, женжел, кьатIунар авай, дикъетлу аял яз чIехи хьана. 1-нумрадин мектеб куьтягьна, ам Ленинград шегьердиз фена ва хуьруьн майишатдин Беседский совхоз техникумдик экечIна. Хъсан чирвилер авай жегьил пешекар яз, ада 1989-йисуз «Поляны» СПК-да кIвалахиз башламишна. Вахтуни Мегьамед Рамазанов вилик кутуна, адани вичи зегьмет чIугвазвай майишат вилик кутаз эгечIна — гьа йикъалай кьенин йикъалди.
Гуьгъуьнлай Мегьамеда кIелунар мад давамарна. Ада Россиядин муниципальный управленидин ва къуллугъдин Кефердинни РагъакIидай патан академия акьалтIарна. Мегьамед Мурадханович “Сад тир Россия” партиядин жергейра аваз пара вахт я. Выборгский райондин агьалийри адал екез ихтибарна, депутатвиле хкяна. Ам депутатрин советдин председателдин заместителни я. Майишатдиз регьбервал гуз, партиядин месэлаяр гьялиз, депутатдин везифаяр, гьакIни хизандин къайгъуяр вири санлай ада гуьнгуьна аваз вилик тухузва.
М.Рамазанов вири хилера къайда хьана кIандай кас я. Неинки са кIвалахал, гьакI хизандани. Ихьтин къилихар чи лезги халкьдиз хас я. Мадни са кар ава, къенин кар пакадал вегьедач, гафунизни вафалу я. Гьар са дердида гаф ише фидай, вичиз вичин кьетIен дипломатия авай Мегьамед Мурадханович Выборгский районда виридаз лайихлу краралди ва вичин тIварцIелди ашкара я. Рамазанова «Поляны» СПК-диз регьбервал гуз гзаф вахт я. Мал-къарадин жигьетдай кIвалах гьамиша цIа ва вацIа, яни кат-калтугда авайди я. Вахтунда векь-кьал кIватIун, вахтунда ем гун, нек ацун ва вахтунда ам маса гун, адалайни гъейри, тевлеяр къенин аямдихъ галаз кьадайвал эцигнава. КIвалахзавай инсанризни ял ядай хъсан шартIарни дуьзмишнавай и хуьруьн майшатдин кархана гьамиша вилик жергейра ава.
СПК — тежрибадин база хьиз я. Дяведин цIаяри алугнавай и чилел СПК, ахпа эхирдай инал гьайванрин жинс хъсанардай завод тешкилна. 1944-йисара колхоз гуьнгуьна хутаз иниз ашкъидалди Ярославлдай, Вологдадай жегьилар атанай. Адалай гуьгъуьниз а тешкилатра чи лезги хва Мегьамедани иштиракна, ам кьиле аваз еке жафаяр чIугунвайди анжах коллективдиз, гьакI областдин векилризни чида.
И карханада гьасилзавай некIедихъ областда еке игьтияж ава. Колхоз кухтур береда 5 кал авайтIа, къе ина 1886 къарамал хуьзва. Карханадин регьбер вири патарихъай коллективдин дережа хкажун ва абуруз къулай шартIар гун патал чалишмиш жезва. СПК-ди садрани кредитар къачунач, налогар вахтунда, зегьметкешризни вацра 2 сеферда гьакъи гузва. Коллектив патал 2 мертебадин кIвалер карханадин такьатралди эцигнава.
2021-йисуз Рамазанов Мегьамедаз “Россиядин хуьруьн майишатдин лайихлу работник” лагьай тIвар гана. Полянский поселенидин депутатрин советрин председателдин заместитель тир чи ватанэгьли гьакIни “Россиядин АПК-дин гьуьрметлу работник” тIварцIин, Гьуьрметдин грамотадин сагьиб я. Гьуьрметдин грамота ва “Регион вилик тухунай тафаватлувилерай” лишан адаз Ленинграддин областдин губернатор А. Дрозденкодини ганай. Экспо-форумдин майдандал, 29-международный агропромышленный «АГРОРУСЬ» ярмаркада адан племзаводдин кали 1-чка кьуна. Ам 10 йисан селекциядин кIвалахдин нетижа тир. Адалайни гъейри, кализ тамашачийриз бегенмиш хьунин пишкешни гана.
Рамазанов Мегьамед неинки машгьур регьбер, гьакI къайгъудар буба, азиз уьмуьрдин юлдаш, хъсан яр-дустни яз чида вич авай чкада. Ада вири межлисра, мергьяматлувилин крара иштиракзава.
— Къенин кар пакадал вегьен тийидай, гафуниз вафалу, инсанперес хесетдин инсан я ам, — лагьанай заз анин чкадин авар миллетдин векил тир Мeгьамеда.
Вахт хьайи береда Мегьамед Мурадханович хайи ерийриз хквезва ва вичин багъри инсанрин арада жезва. Ихьтин вядеяр адаз пара багьа ва истеклу я. Адан руьгь шад жеда, адаз вири къужахламишиз кIан жеда, са гафуналди, лувар акатна, илгьамдив ацIана хъфида мад вичин кьисмет авай чкадиз. Адан мурадни чи лезги чилел хуьруьн майишат вилик фин, ам абад хьун я.
Бикеханум Алибегова
