КьетIен бажарагъдин сагьиб хьайи лезгийрин шаир Лезги Нямета “ХьанайтIа” шиирда, Ватандиз гзаф хийир гун патал гьи пеше хкягъун хъсан ятIа лугьуз, веревирдер ийизва. РикIел Карл Маркса лагьай гафарни къвезва: “Вичин пеше дуьз хкягъиз тахьай кас виридалайни бахтсузди я”. Эхь, инсанди пеше дуьз, вичин рикIин эмирдалди хкягъунихъ еке метлеб ава. ГьикI лагьайтIа, рикI алай пешедин иесидихъ кIвалахда агалкьунар жеда, кIвалахди адаз руьгьдин таъминвал гуда. Пешедай бахтлувал жагъанвайбурукай яз, чавай бажарагълу культработникар ва музыкантар тир Шихсаид Шихнабиеван ва Султанагьмед Хидирован (шикилда) тIварар кьаз жеда.
Районда ва адалайни къеце гзафбуруз тежрибалу культработникар яз чизвай Ш.Шихнабиева — НуьцIуьгърин, С.Хидирова Эминхуьруьн культурадин кIвалерин директорар, гьа са вахтунда и хуьрерин зонайра кардик квай культурадинни ял ягъунин центрайрин (КДЦ-рин) руководителар яз кIвалахзава. И маканар хуьрерин агьалийрин рикI алай чкайриз элкъуьн, гьелбетда, абурун зегьметдин нетижа я.
Гьеле школада кIелзавай йисара манияр лугьунал, музыкадин алатар ягъунал рикI алай Шихсаида гуьгъуьнлай Дагъустандин культпросветучилище акьалтIарна. Адалай инихъ Ш.Шихнабиева нуьцIуьгъвийриз культурадин рекье намуслудаказ къуллугъзава.
Культурадин кIвале са шумуд кружок, 12 касдикай ибарат тир художественный самодеятельностдин коллектив кардик ква. Устаддаказ кларнет, зуьрне, далдам язавай, ширин сесиналди манияр тамамарзавай Ш.Шихнабиева райондин культурадин дворецдин патав кардик квай фольклордин “Куьре” ансамблдин кIвалахдани активвилелди иштиракзава. Ам фестивалрин, килигунрин лауреатни я.
Эминхуьруьнви Султанагьмед Хидировни далдам, чIагъан, зуьрне ядай, манияр лугьудай устад я. Ада са шумуд йисуз “Аламишинский” совхозда уьзуьмчивилин бригададин бригадирвилени кIвалахна. Гьа йисара ада, Эминхуьруьн культурадин кIвалин художественный самодеятельностдин активный иштиракчи яз, гьам хуьре, гьамни районда тухузвай культурадин, шадвилин мярекатра иштиракиз хьана.
КьетIен бажарагъдиз килигна, С.Хидиров хуьруьн культурадин кIвале кIвалахал кьабулна. Вичин рикI алай пешедай кIвалахиз 20 йисалай виниз я.
С.Хидиров райондилай къецени машгьурвал къазанмишнавай ва “Халкьдин коллектив” тIвар ганвай “Кьасумхуьруьн далдамчияр” ансамблдин иштиракчини я.
Районда кардик квай Россиядин халкьарин культурадин адетрин центрадин руководителдин заместитель, бажарагълу культработник ва машгьур конферансье Ярагьмед Ярагьмедова чаз лагьайвал, культработникар, музыкантар ва манидарар яз, Шихсаид Шихнабиева ва Султанагьмед Хидирова гьам районда, гьамни республикада тухузвай культурадинни шадвилин мярекатра, килигунра, фестивалра иштиракзава, анра кIвенкIвечи чкаяр кьазва.
Хкянавай пешеди руьгьдин таъминвал гузвай Шихсаид Шихнабиеваз ва Султанагьмед Хидироваз агьалийрин патай гьуьрмет, кIанивал ава.
Хазран Кьасумов
