Лезги чIалан йикъан сергьятра аваз 10-октябрдиз Кьасумхуьрел, медениятдин дараматдин  вилик квай майдандал, шадвилин чIехи мярекат кьиле фена. Концертда Азербайжан Республикадин Баку шегьерда кардик квай манийрин “Сувар” ансамблдин манидар  Жамиля  Заловадини  иштиракна. Чаз гьам Азербайжанда, гьам Дагъустанда машгьур манидардихъ галаз гуьруьшмиш жедай ва адаз са шумуд суал гудай мумкинвал хьана.

• Жамиля ханум, ваз ХХ асирдин Гомеран — СтIал Сулейманан район, адан агьалияр гьикI акуна? Вавай къенин мярекатдикай вуч лугьуз жеда?

— Дугъриданни, СтIал Сулейманан районда зун сад лагьай сефер я авайди. Куь ерияр пара гуьзел я, инсанарни  — чинал хъвер алайбур. Зун куь районда икь­ван хъсандиз чизвайди, инсанриз зун кIанзавайди, абуру гьуьрметзавайди заз чизвачир. Пара сагърай райондин агьалияр, зи багърияр, чан жуванбур!

Районда лезги чIал чирун, хуьн ва вилик тухун па­­тал пара кIвалах тухузвайди заз чизвай. Иниз атайла, заз райондин кьил Нариман Абдулмуталибовахъ, Да­гъустандин халкьдин шаир Майрудин Бабахановахъ, мергьяматлувилин “Умуд” фондунин председатель Савин Велиевахъ, яратмишдай интеллигенциядин векилрихъ, чIалан муаллимрихъ галаз мукьу­вай таниш жедай мумкинвал хьана. Лезги чIал хуьн, ви­лик тухун патал ийизвай еке кIвалахдай абур сагърай!­

Къенин мярекатни заз пара бегенмиш хьана. Заз теклиф авунайни чухсагъул. Концертдин программадик за  тамамарзавай кьве мани кутунвай, амма агьа­лийрин тIалабуниз килигна за муьжуьд мани тамамарна. Вахт авайтIа, манияр мадни ядай. Заз куь жа­ванри кьуьлерикни теклифна, тамашачийри заз цуькверни гана. И карди зун пара шадарна. РикI ачух, мугь­манперес инсанар я куьревияр.

• Чаз “Сувар” ансамбль хъсандиз таниш я. Адан коллективди лезги чIалан таблигъат тухун ­патал вуч кIвалах тухузва?

— Чи ансамблдин репертуарда лезги авторрин манийри еке чка кьазва. МасакIа хьунни мумкин туш, ансамблдин регьбер Седакъет Керимова лезги чIа­лахъ рикI кузвай, чIал хуьн патал еке кIвалах тухузвай кас я. Ада кхьей “Чун лекьер я” шиир гьам Азербайжандин лезгияр яшамиш жезвай районра, гьам  Дагъустанда гимндиз элкъвенва. Чаз чизва хьи, СтIал Сулейманан рай­онда и шиир кIелунай школьникрин арада флэшмо­бар тухвана. И шиир районда ва адалай къеце парабуруз, гьам чIехибуруз, гьамни жаванриз хуралай чизва.

Азербайжанда лезги чIалал яратмишзавай ва лезги ктабар акъудзавай писателар, шаирар ава. Чна винидихъ тIвар кьур Седакъет Керимова и карда вирибуруз чешне я.

• Жамиля ханум, СтIал Сулейманан райондай вун гьихьтин фикирар, ниятар аваз хъфизва?

— Фикирар, ниятар лап хъсанбур, къенибур я. Дуьз лагьайтIа, райондай зун адан гуьзел ерийрихъ, сиверал хъвер алай агьалийрихъ вил галамаз хъфизва. За райондин гьакимриз, агьалийриз хиве кьунва хьи, са мумкинвал хьайила, “Сувар” ансамблдин амай ве­ки­ларни галаз, зун СтIал Сулейманан райондиз къведа, райцентрадал алай медениятдин дараматда са вижевай­ концерт къалурда. Гьавиляй за къе райондин агьалийриз “сагърай” ваъ, “гьелелиг” лугьузва.

Куьне, играми районэгьлияр, дидедин чIал хуьх, вилик твах, чна, квез чухсагъул лугьун яз, хъсан мани­яр тамамарда, куь ашкъи-гьевес хкажда.

Хазран Кьасумов