Ибрагьим Гьуьсейнован — 85 йис
СтIал Сулейманан райондин кьилин ктабханада СССР-дин писателрин Союздин член, машгьур шаир, драматург ва таржумачи Ибрагьим Гьуьсейнован 85 йис тамам хьуниз талукьарнавай эдебиятдин мярекат кьиле фена.
Ана шаирдин яратмишунрал рикI алай хуьрерин библиотекайрин кIелзавайбуру, райондин яратмишдай интеллигенциядин векилри, Алкьвадрин хуьряй атанвай шаирдин ирссагьибри, школьникри иштиракна. Мярекатдин сергьятра аваз ктабханадин кIелдайбурун залда “Зи чил Кьулан синин тар я Къавкъаздин” кьил гана, И.Гьуьсейнован ктабрин выставка ачухнавай.
Эдебиятдин межлисдал рахайбуру Ибрагьим Гьуьсейнова лезги литературадик кутунвай чIехи пай, шаирдин яратмишунрин алемдин кьетIенвилер къейдна.
И.Гьуьсейнова лезги халкьдиз чIехи ирс тунва. Адан къелемдикай “Рекьер-хулер”, “Шарвили”, “Кьве гъил”, “Муьгъ”, “Девлет”, “Рекьер куьруь жезва”, “Ватан”, “Тезенаг”, “Мирг”, “Бахтар пайзава” — санлай 40-далай виниз ктабар хкатнава.
“Шаир, вуна тариф ая Ватандин, Уьзуьагъвал артухардай инсандин” гафар кхьей, гьамиша лезги чилин тариф авур, халкьдин кьисметдихъ рикI кайи Ибрагьим Гьуьсейнован экуь къамат несилрин рикIера эбеди я.
Хазран Кьасумов
