Махачкъаладин гьуьлуьн портуна сергьятар хуьдай “Расул Гьамзатов” гимидал Россиядин ФСБ-дин органрин сергьятар хуьдай гимийрин ва кетеррин пайдах хкажуниз талукь мярекат кьиле фена. Ана Дагъустан Республикадин Кьил Сергей Меликовани иштиракна. Идакай чи редакциядиз региондин регьбердин пресс-къуллугъди хабар гана.
— Дагъустандин машгьур рухвайрин чешнедалди акьалтзавай несилар ватанпересвилин руьгьдаллаз, хайи чилихъ рикI куз вердишаруниз куьмек гузвай ихьтин мярекат хъсан адет я,- лагьана Сергей Меликова.
“Сергьят хуьдай гимидиз Социализмдин Зегьметдин Игит Расул Гьамзатован тIвар гуни чи сергьятар хуьдайбурунни дагъустанвийрин арада мягькем алакъаяр авайвилин гьакъиндай шагьидвалзава. Им гьакI чи зурба шаирдиз, адан яратмишунриз ийизвай гьуьрметни я. Россиядин сергьятар хуьн патал чпин чанарни гьайиф татай Россиядин Игитрин — пограничник Радим Халикьован, старшина Мухтар Сулейманован ва ст.сержант Абдулхаликь Къурбанован тIварарихъни республикада авай гимияр янава”,- лагьана Сергей Меликова, сергьятчийрихъ элкъвена.
Къейд авурвал, сергьят хуьдай еке гими Махачкъаладин портуна амукьда.
Россиядин ФСБ-дин сергьятчийрин Дагъустандин управленидин начальник Андрей Карпенкоди лагьайвал, портуниз цIийиз хканвай гимиди уьлкведин кьибледин сергьятар мягькемдиз хуьда.
«Лезги газет»
