Кьурагь районда Украинада кьиле физвай
махсус серенжемдин иштиракчийрин кIвалерив хъуьтIуьз кудай кIарасар агакьарзава
И йикъара Кьурагь райондин администрацияда муниципалитетдин кьил Замир Азизован регьбервилик кваз Украинада кьиле физвай махсус серенжемда иштиракзавайбуруз пулдин такьатар кIватIун, жуьреба-жуьре рекьерай куьмекар гун патал уьлкведин дережада аваз кардик кутунвай “Мы вместе” проектдин штабдин заседание кьиле фена.
Замир Азизова къейд авурвал, Кьурагь райондай, тамам тушир мобилизациядин сергьятра аваз, 27 касдиз эвер ганва. Абуруз ва Ватандин сергьятар хуьзвай амай ватанэгьлийризни куьмекар гуник пай кутазвай вирибуруз райондин кьили сагърай лагьана.
Къейд ийин хьи, гзаф кьадар маса муниципалитетри хьиз, Кьурагь райондини серенжемдин иштиракчийриз куьмекар гунин кардик пай кутазва. Кьилди къачуртIа, серенжем кьиле физвай мулкарал къуллугъзавай аскерриз райондай са шумуд сеферда недай-хъвадай суьрсет, алукIдай парталар, кIвачин къапар, дарманар ва маса затIар рекье туна. Абур маса къачун патал пулдин такьатар районда кардик квай идарайри кIватIна.
“Мукьвара серенжемда иштиракзавай са шумуд касдин кIвалерив хъуьтIуьз пичера кудай кIарасар агакьарнава”, — лагьана Замир Азизова, “Мы вместе” проектдин сергьятра аваз районда кьиле тухванвай кIвалахрин нетижаяр кьадайла. Адан фикирдалди, и кар давамарна кIанда. Гьа са вахтунда райондин кьили тамарин майишатдин са жерге къуллугъчийрилай вичин наразивални къалурна. Малум хьайивал, абуру кIарасар агакьарунин кIвалах энгел тахьун патал тамай кIарасар атIудай чкаяр вахтунда тайинарнач. З.Азизова и кIвалахдиз кьецI гузвай крар тади гьалда арадай акъудун тапшурмишна ва Украинада кьиле физвай серенжемда иштиракзавай Кьурагь райондин агьалийрин хизанрив мукьвара 100 агъзур манатдин кьадарда аваз пулдин куьмек агакьдайдакай хабар гана.
“Мы вместе” проектдин сергьятра аваз районда давам жезвай кIвалахрикай чпин фикирар проектдин Кьурагь районда кардик квай штабдин кьил Рамиз Рамазанова, муниципалитетдин ветеранрин советдин председатель Фахрудин Мирзоева, КЦСОН-дин директор Эльбрус Гьажиева, штабдин членар тир Кьурагьрин хуьруьн 1 ва 2-нумрайрин юкьван мектебрин директорар Гьамид Мисриевани Магьарам Къазиева, муниципалитетдин дишегьлийрин советдин председатель Эльмира Исаевади ва масабуру лагьана.
«Лезги газет»
