И йикъара Ахцегь райондин кьил Осман Абдулкеримов ва райондин депутатрин Собранидин председатель Абдул-Керим Палчаев Ахцегь хуьруьн ООШ-диз мугьман хьана. Идакай «Лезги газетдиз» райадминистрациядин пресс-къуллугъди хабар гана.
О.Абдулкеримова алатай йисалай кардик республикадин «150 мектеб» проектда иштиракунин барадай мектебда кьиле тухванвай кIвалахрикай хабарар кьуна.
Гуьгъуьнлай мугьманри мектебдин дараматдин къенепатан, гьаятдин гьаларизни килигна. Райондин кьили ремонтдин кIвалахар тухунин чарасузвал авайдакай къейдунихъ галаз сад яз, программадай харждай такьатрин документдик лап важиблу чкаяр кутун герек тирди лагьана.
Осман Абдулкеримова тербия ва чирвилер гунин карда зегьмет чIугунай, райондин жемиятдин уьмуьрда иштиракунай мектебдин директор Мейрам Рамазановадиз чухсагъул малумарна.
«Чунни гьар гьихьтин хьайитIани куьмек гуз гьазур я. Квевай чна истемишзавайди образованидинни тербиядин нетижалу гьалар я», — лагьана О.Абдулкеримова.
«Лезги газет»
