Малум тирвал, алай вахтунда Махачкъаладин патав, Каспий гьуьлуьн къерехда, “Анжидин” кIелунинни тренировкайрин база авай чкада хкягъай командаяр олимпиадайриз гьазурдай Центр эцигзава.

Исятда ина спортсменар патал мугьманханайрин комплекс, кьве спортзал эцигна куьтягьзава. Спортдин залрикай сада азаддиз ва грекринни римлуйрин жуьреда кьуршахар кьун патал 6 гьасир гьакьда. Муькуьди кьилди дзюдоистар патал я. Центрадин сергьятра сирнавдай еке бассейн, футболдин майдан, тренажёррин зал, воркаут майдан, массаж ийидай кабинетар, парилкаяр, аялринни жаванрин спортшкола, ял ядай чкаяр жеда.

И мукьвара РД-дин физический культурадин ва спортдин министр Мегьамед Мегьамедов эцигунар кьиле физвай те­гьердихъ галаз таниш хьана.

— Спортдин и объектар планда авайвал эцигзава ва республикадин регьбер Рамазан Гьажимурадовичан гуьзчивиликни ква. Инанмиш я, спортсменар олимпиадайриз гьазурунин Центр ачухун Дагъустандин тре­нерар ва спортсменар патал чIехи савкьат жеда. Виликрай чи спортсменрин сборар Даггоспедуниверситетда авай ЦОП-да кьиле физвай. Къе ина ашкъи авай вири гьакьзавач, амма  цIийи чкада спортсменри чеб лап къулайдиз гьиссда, вучиз ла­гьай­тIа, ина абур патал вири шартIар тешки­лун фикирда кьунва, — алава хъувуна министрди.

Къейд ийин, минспортдин векилри лугьузвайвал, Центр къведай йисан гатуз  ишлемишиз вахкуда. Эцигунар кьиле тухун патал такьатар республикадин бюджетдик кутунва ва кьилдин карчиярни кьулухъ ­акъвазнавач, куьмекар гузва.

Лезги Газет