Хъсан инсанар садрани рикIелай фидач. Нурлу гъетери хьиз, абуру чи бейнида гьамишалугъ чка кьада. Гьа ихьтинбурукай сад тир Марина Саидовна Алиметова. Биологиядин илимрин кандидат, кафедрадин доцент тир ам 1970-2006-йисара Дагъустандин мединститутда кIелай студентриз хъсан муаллим, адахъ галаз кIвалахзавай юлдашриз, таниш ксариз рикIиз чими, чинал мили хъвер алай, гьар са касдин гъавурда акьадай инсан яз чидай. Адахъ вичин тарс хушвилелди, гьевесдивди аялрив агакьардай бажарагъ, устадвал авай. Ам студентар патал са шумуд пособидин (абурай къени студентри тарсар чирзава), хейлин макъалайрин автор я.
Садра адан тарсуна ацукьун зазни кьисмет хьана. Дугъриданни, заз тарс куьтягь хьана кIанзавачир. За гьар са студент адаз вичин аялар хьиз багьа тирди гьисснай. Марина Саидовнадиз инсанвилин виниз тир дережаяр хас тир. Къецепатан гьукуматрай атанвай студентриз ада, кIвале гьазуриз, тIуьнар, чими фу, ниси тухудай, абур гъурбатдай атанвайбур я лугьуз.
Дерин чирвилерин, яргъал йисарин тежрибадин сагьиб хьиз, ам макьамрал, манийрал рикI алайдини тир. Ада вири чIаларал манияр лугьудай, уьмуьрдал гьакьван кьару тир ва шадвал кIандай адаз. Садра таниш хьайила, гьамиша акунихъ вил жедай инсанрин жергедай тир Марина Саидовна. Адан кIвалин ракIар юкъузни, йифизни ачух тир. РикI дар тахьайтIа, кIвални дар жедач. За гьамиша и гафар зи аялризни лугьузва. Марина вах 4 аялдин диде тир. Ада ва адан уьмуьрдин юлдаш Балабег стхади чпин веледриз чешнелу тербия гана. Рашид медицинадин илимрин кандидат я. Москвада еке центрада хирург яз зегьмет чIугвазва. Юридический илимрин кандидат тир Эльдара къанун-къайда хуьдай органра кIвалахзава. Айида — чIехибурун, Заира аялрин духтурар я. Абур кьведни азарлуйрихъ рикI гваз эгечIдай, чпин дидеди хьиз вири дуьшуьшра инсанвал вине эцигзавай таватар я.
Адан веледри чпин буба гъилерал кьуна хуьзва. Диде-бубадин хатур хан тийизвай, жувандини чаради чидай намуслу рухвайризни рушариз аферин! Бахтар акурай чпин веледрикай! Марина Саидовна чи арада амачиз гзаф йисар я. Гьайиф къведай са кIвалах мадни ава – еке ва кьакьан кIвалера лап тIимил яшамиш хьана Марина вах. Адаз вичин чIехи хьайи хтулар, абурун зегьметдин рехъ акунач. Абуру лагьайтIа, вирида вузар акьалтIарна, чи уьлкведин меркезда жуьреба-жуьре хилера кIвалахзава, обществодиз хийир гузва. Марина вахан экуь къамат рикIел хкуналди, лугьуз кIанзава: вуна цайи къизилгуьл кьуранач, адал цацарни алач. Гьар гатфариз къвез ацукьиз билбил, чи рикIел хкизва ви ширин ван.
Магьиханум Ярагьмедова-Эфендиева
