Зун и йикъара подпискадин патахъай Дербент шегьерда авай РФ-дин казначействодин управленидин Дагъустанда авай 2-нумрадин отделдин начальникдин заместитель Тамара Хинабиевадин патав фенвай. Ада зун хушдаказ кьабулна ва М. Абдуллаевахъ галаз суьгьбет авун теклифна.
Абдуллаев Мурадагъа 1976-йисуз Дербентда бине Кьурагь райондин КIиридай тир къенепатан крарин майор Мегьамедсадикьан хизанда дидедиз хьана. Муьжуьд аял авай хизанда чIехи хьанвай адаз тербиядин рекьяй хъсан тежриба ава. Школада кIелдай йисара ада хъсан чирвилер къачуниз артух фикир гудай. ИкI, ада шегьердин 21-нумрадин юкьван школа чешнелудаказ акьалтIарна, 1993-йисуз ДГУ-дин финансринни экономикадин факультетдик экечIна. Университетда хъсандиз кIелунилай гъейри, ада жемиятдин крарани активнидаказ иштиракдай. 1998-йисуз адаз армиядин женгейриз эвер гана. Кеферпатан флотда цин кIаникай фидай луьткведа къуллугъ авун кьисмет хьана. КIвализ ам старшина яз хтана.
2000-йисуз Федеральный казначействодин управленидин Дагъустанда авай 2-нумрадин отделдиз ам казначей яз кьабулна. 2006-йисуз — 2-разряддин старший пешекарвиле, 2008-йисуз пешекар-экспертвиле эцигзава. Алай йисан апрелдиз ам начальникдин заместителвиле тайинарна.
Ихтилатар ийиз гатIунайла, заз адан къилихрин цIийи тереф ачух хьана: фагьумлувал, акьуллувал ва дамах гвачирвал.
— Финансрин рекьяй кьилин образование авайтIани, сифте иниз атайла, зун ина кIвалахиз жеда лагьана, жув-жувахъ агъунвачир, — рикIел хкизва ада. – Яваш-яваш крар виликди физ гатIунна. За нормативно-правовой актар, компьютердин программаяр, цIийи технологияр тамамдиз чирна. Гьелбетда, и рекье заз юлдашрини куьмек гана. Гьа икI, кIвалахдин яцIа гьатна, зун вилик фена.
Казначействодин работникрин хиве жавабдар кар ава. Абуру федеральный, региондин ва чкадин бюджетрал гуьзчивал ийизва.
Алай вахтунда 2-нумрадин отделди бюджетдай пул къачузвай кьуд муниципалитетди (Дербент, Табасаран районар ва Дербентни Дагъустандин Огни шегьерар), финансринни бюджетдин ахтармишунинни гуьзчивилин везифаяр кьилиз акъудзава.
Отделда 38 касди зегьмет чIугвазва. Кьилин офисдилай гъейри, Хучнида пуд ва Дагъустандин Огни шегьерда ругуд векилди кIвалахзава.
Адан амадаг Тамара Хинабиевади къейд авурвал, кар алакьдайди хьиз, ам къвалав гвайдаз яб гудайди ва вичин гафуниз вафалудини я. Идалайни гъейри, ада вичиз компьютеррин система лап тамамдиз чирнава.
2008-йисуз Мурадагъа РД-да авай Федеральный казначействодин Управленидин Дербентда авай 2-нумрадин отделдин пешекар-экспертвилин къуллугъдал эцигнай.
Леке квачиз, нетижалудаказ гражданвилин къуллугъ тамамарунай, гьакIни яргъал йисара гьакъисагъвилелди зегьмет чIугунай ам Дагъустан Республикада авай Федеральный казначействодин управленидин са шумуд шабагьдиз лайихлу хьана.
2016-йисуз Мурадагъа Мегьамедсадикьович РФ-дин Гьукуматдин, РФ-дин финансрин министерстводин ва Федеральный казначействодин руководителдин тапшуругъар ерилудаз кьилиз акъудунай, гьакIни яргъал йисара гьакъисагъвилелди зегьмет чIугунай шабагьдин сагьиб хьана.
— Мурадагъа Мегьамедсадикьович, исятда саки вири тешкилатар, карханаяр электронный документооборотдал элячIзава. И кар куьна гьикI кьиле физва? – хабар кьуна за…
— И хиле Федеральный казначействодихъ аквадай хьтин агалкьунар ава. «Электронный бюджет» система себеб яз, Федеральный казначействодин ва финансрин документар яргъалай кьабулуниз килигна, сада-садахъ галаз алакъа аваз кIвалахун электронный къайдада кьиле тухузва. ИкI кIвалахдайла, чкадал атун герек къвезвач, вахт кьенят жезва. Суткадин къене месэла туькIвенани, туькIвеначни жаваб гузва. Исятда чарчел алаз гъизвай документрин кьадар лап тIимил ама.
Мурадагъа Мегьамедсадикьович туькIвей хизандин кьилни я. Ада уьмуьрдин юлдаш Селфинадихъ галаз санал кьве хциз тербия гузва. Веледар намуслубур, гъвечIи-чIехи чидайбур яз тербияламишнава. Селфинади Дербентдин кьилин больницада медсестра яз кIвалахзава.
Бубадин тIвар эхцигнавай чIехи хва Мегьамедсадикь, школа къизилдин медалдалди акьалтIарна, Ставрополдин медицинадин госуниверситетдик экечIна. Кьвед лагьай курсуна ава. ГъвечIи хва Алимурада 10-классда кIелзава.
Къагьриман Ибрагьимов
