Украинада кьиле физвай махсус серенжемдин иштиракчийриз ва абурун хизанриз куьмекар гун алай вахтунда кар алай месэлайрикай сад я. Дагъустанда и жигьетдай кьиле тухузвай кIвалах республикадин Кьил Сергей Меликова вичин гуьзчивилик кутунва ва шегьеррин, районрин администрацийриз СВО-дин иштиракчийрин, абурун мукьва-кьилийрин тIалабунриз фикир гун, абур кьилиз акъудун тапшурмишнава.
СтIал Сулейманан райондин администрациядин пресс-къуллугъди хабар гузвайвал, мукьвара СВО-дин иштиракчийрин хизанрин тIалабуналди НуьцIуьгърин хуьруьн са куьчеда къир цана ва газдин турбайрин цIийи линия тухвана.
Виликдай хуьре авадан авунин кIвалахар кьиле тухун патал муниципалитетдин кьил Саид Темирханован патав НуьцIуьгърин хуьруьн агьали Мизамудин Алимов атанай. Агъсакъалди кьве хтул — халис кьегьалар чIехи авуна. Гьайиф хьи, абурукай сад, Ватандин аслу туширвал хуьдайла, телеф хьана. Къуй адан хизанрин, вири мукьва-кьилийрин рикIериз Аллагьди сабур гурай. Жамбул Алимован тIварцIихъ хайи хуьруьн мектеб янава.
Саид Темирханован тапшуругъдалди герек тир вири чарар-цIарар гьазурайдалай кьулухъ газдин турбайрин цIийи линия тухвана ва ам кардикни кутуна. Етим Эминан тIварцIихъ галай куьчеда къирни цанва. Нетижада СВО-дин иштиракчийрин мукьвабурун тIалабунни кьилиз акъудна, чкадин агьалийрин яшайишдин шартIарни хъсан хьана.
Чи мухбир
