Украинада кьиле физвай дяведин махсус серенжемда хейлин дагъустанвийри иштиракзава. РикIе Ватан хуьнин къаст авай абуру гьар камуна викIегьвилер къалурзава, чIехи бубайрин баркаллу крар кьегьалвилелди давамарзава. СВО-дин иштиракчияр хьайи чи ватанэгьлийрикай РФ-дин Президент Владимир Путинан Указдалди 15 кас Россиядин Игитдин тIварцIиз лайихлу хьана. Гьикьван гьайиф къведай кар ятIани, абурукай бязибуруз Игитдин «Къизилдин Гъед» кьейидалай кьулухъ гана. 15-дакай 4 кас чи халкьдин векилар я: чепиви Энвер Набиев, хъуьлуьдви Мегьамедали Мегьамеджанов, сайтархуьруьнви Муслим Муслимов ва кьасумхуьруьнви Султан Сулейманов.
Къейд ийин хьи, СВО-диз са хизандай са шумуд кас фенвай дуьшуьшарни ава. Кьурагь райондин Ашар хуьряй тир Халикьоврин хизан гьа ихьтинбурукай сад я. Гьайиф хьи, стхаяр тир Халикьоврикай сад са йис идалай вилик женгер кьиле физвай майданра гел галачиз квахьна. Къе чи ихтилат и баркаллу хизандин векил тир Жаврудин Жалалович Халикьовакай я.
Жаврудин Халикьова икьрардин бинедаллаз махсус серенжемда 2024-йисан октябрдилай иштиракзава. Кьурагь райондин администрациядин информациядин технологийрин ва печатдин центрадин регьбер яз кIвалахзавай ада са йис идалай вилик «Барс» тIвар алай батальонда къуллугъзавайбурун жергейрик экечIдай къарар кьабулна.
«За къанни ругуд йисуз къанун-къайда хуьдай органра, СОБР-да, ОМОН-да къуллугъна. Жуван хва, кьве стха СВО-да аваз, завай кабинетда ацукьиз хьанач, Ватан хуьзвай чи гадайриз куьмек гудай фикирдал атана», — суьгьбетзава Жаврудин Халикьова.
Военный рекьяй алакьунар, чирвилер авай чи ватанэгьли СВО-диз фейила, адан хиве «Барс» батальондин командирдин заместителдин везифаяр туна. Кар алакьдай, акьалтIай жавабдар лезги хци къуллугъдин рекьяй вичин вилик эцигзавай гьар са везифа намуслувилелди кьилиз акъудзава. Фронтдиз куьмекар гунай, СВО-дин иштиракчийрал недай-хъвадай суьрсет, яшайишда герек къведай маса затIар агакьарунай, военный рекьяй командованиди гузвай тапшуругъар хъсан ери аваз кьилиз акъудунай адаз «Барс» батальондин председателдин ва 41659-нумрадин кьушунрин регьбердин приказралди «За участие в спецоперации» медаль гана. Са кьадар вахт арадай фейила, Жаврудин Халикьов нубатдин шабагьдиз — «За помощь фронту» медалдизни лайихлу хьана.
Мукьвара Жаврудин Халикьов отпускдиз хайи республикадиз хтана. Дагъустандин Кьил Сергей Меликован Указдалди СВО-да къалурнавай дирибашвиляй кьегьал ашавидиз «За проявленное мужество» медаль гана. Шабагь адав РД-дин Гьукуматдин Председателдин заместитель Рамазан Жафарова РФ-дин ВДВ-дин (воздушно-десантные войска) 95 йис тамам хьунихъ галаз алакъалу яз Махачкъалада кьиле фейи мярекатдин сергьятра аваз вахкана.
СВО-да иштиракиз са йисни тамам тахьанмаз, сад-садан гуьгъуьналлаз са шумуд медалдиз лайихлу хьун — им викIегьвилин, къастунал кIевивилин лишан я. Жаврудин Халикьован агалкьунрал неинки адан хизанди, адахъ галаз Кьурагь райондин администрацияда санал кIвалахзавай юлдашри, гьакIни ам чидай гьар сада дамахзава. Вири къулайвилер авай кIвалах, кIвал-хизан туна, гуьгьуьллудаказ Ватан хуьз фин, са шакни алачиз, чIехи ватанпересвал я. Ватанпересвал лагьайтIа, Халикьоврин вири хизандиз хас я. Чна макъаладин эвел кьиляй къейд авурвал, алай вахтунда Украинада кьиле физвай махсус серенжемда Жаврудин Халикьован хци ва стхади иштиракзава. Къуй абур ва хайи чилин азадвал, аслу туширвал хуьзвай гьар са аскер сагъ-саламатдиз, гъалибвални гваз чпин хизанрин, мукьва-кьилийрин патав хкведайвал хьурай. Амин!
Мегьамед Ибрагьимов
