Лезги хуьрер
СтIал Сулейманан райондин НуьцIуьгърин хуьр КIварчагърин хуьруьн администрациядик акатзава. И хуьр райцентрадивай 9 километрдин яргъа ава.
НуьцIуьгърин мулкарай авахьзавай Дагьардин вацIун чапла къерехда, кьакьан раган ценерив, дуьзен чкадал куьгьне хуьруьн амукьаяр ала. И чкадин винел паталай кишпирдин эвелан девирдиз талукь хъенчIин ва чахмахдин къванцин гьар жуьре затIар кIватI хъувуна.
НуьцIуьгърин хуьруьвай 0,5 километрдин кьиблединни рагъэкъечIдай патан терефдихъ, кьуьгъвер авунвай тепедал, 300х150 метрдин майдан кьунвай хуьр хьана. А тепедилай чи девирдин I-II асирриз талукь хъенчIин материалар жагъанва.
Хуьруьвай 300 метрдин рагъэкъечIдай патахъ галай участокда, кIамун патав, куьгьне ЧIварах (Чорох) хуьр ава. И хуьруькай амайди анжах са минара я. И чкадай пешекарри кIватIнавай хъенчIин шейэр юкьван асиррин эхиррин девирдиз талукьбур яз гьисабзава.
НуьцIуьгърин хуьруьн мукьув къадим сурар гва. Инсанри чеб хкуддайла, и чкадикай цурун цамар ва япагьанар жагъана.
Кьуьзуь агьалийрин гафаралди, хуьр 500-600 йис идалай вилик арадал атана. Куьгьне хуьруьн харапIайрин арада къаравулвилин минарадин эцигунрикай ама. И минара туькIуьрай вахт садазни малум туш. Амма куьгьне мискIин эцигайдалай инихъ 150-далай гзаф йисар алатнавайдакай инсанриз хабар ава. Тарихда малум тирвал, и мискIин устIар Гьисена эцигна.
1886-йисан переписдин делилралди, и хуьре 127 майишат ва 671 агьали (350 итим ва 321 дишегьли) авай.
1959-йисуз нуьцIуьгъвийри дуьзенлухда кIвал-югъ кутун кьетIна. Дагъларин ценерив гвай чкайрай КIварчагъ дередиз эвичIна, ина багъларни бустанар галай кьве гьавадин кIвалер эцигна. Алай вахтунда хуьре 340-далай гзаф кIвалер ва 1171 агьали ава.
Мурад Мегьамедкеримован «СтIал Сулейманан район: тарихдин гелерай» ктабдай.
