И йикъара Кьурагь райондин администрациядин заседанийрин залда райондин кьилин заместитель Махач Хариева райондин идарайринни тешкилатрин жавабдар къуллугъчийрин иштираквал авай совещание кьиле тухвана. И гьакъиндай «Лезги газетдиз» райадминистрациядин пресс-къуллугъди хабар гузва.

Райондин образованидин управленидин начальник Р.Катибова алатай гьафтеда образованидин хиле тухвай кlвалахрикай суьгьбетна. Къейд авурвал, алатай гьафтеда вири предметрай олимпиададин мектебдин пай тухванва ва алай вахтунда муниципальный пай гатlуннава. Олимпиададин райондин паюнин кlвалахар Махачкъалада ахтармишда ва нетижайрин бинедаллаз, республикадин паюна иштиракдайбур тайинарда.

Р.Катибова алава хъувурвал, классар чими авунин сезондиз мектебра гьазурвилер акунва, герек тир вири затlар къачунва.

Совещанидал чпин кlвалахрикай, вилик акъвазнавай месэлайрикай хуьруьн майишатдин ва чилерихъ галаз алакъалу отделдин начальник А. Фаталиева, ЦРБ-дин кьилин духтур А.Азимова, ЖКХ-дин директор М.Османова, экономикадин отделдин начальник И.Муслимова ва масабуру ихтилатна.

«Лезги газет»